CARITO RANDAI PALIMO GAGA TERBARU

CARITO RANDAI

PALIMO GAGA JO SIRENO  NILAM

KESENIAN TRADISIONAL MINANGKABAU

“SANGGAR MUDO BARAPI”

Kota solok

Pemeran

1.      PANGLIMO GAGA

2.      BUJANG BAGANTO

3.      RENO NILAM

4.      CIAK MENAN

5.      GALANG SAPIK

6.      TUAK LEMAN

SINOPSIS

Cerita Ini Mengisahkan Tentang Perjodohan Antara Panglimo Gaga Dan Sireno Nilam, Reno Nilam Adalah Seorang Anak Yatim Piatu Yang Tinggal Bersama Mamaknya Ciak Menan, Lantaran Karna Sang Mamak Memiliki Hutang Kepada Panglimo Gaga karena kalah judi, Sehingga Mamak Berniat Memebayar Hutang Tersebut Dengan Menjodohkan Reno Nilam Dengan Panglimo Gaga, Tetapi Reno Nilam Menolak Kemauan Mamaknya.

PERMULAAN

Randai masuk di iring dengan calempong

1.      DAYANGDAINI

Mano Sagalo Niniak jo Mamak

Sarato sanak Jo Sudaro2x

Rila jo Maaf nan kami mintak

Randai dimulai langkah di angkek2x

SEKAPUR SIRIH

Assalamualaikum pamulo pambukak kato
Bismillah kato dimulai

Salam jo sambah disampaikan

Bagai awa pamulai kato

Sipatan rundiang  pandahuluan

Salam taunjuak sanak sudaro

Iyo kaganti bajawek tangan

Kami nak randai Mudo Barapi

Nan talatak Ditanah Garam

Dalam daerah Kota Solok

Banda urang kami bandakan

Banda nak lalu kamuaro

Kaba urang kami kabakan

Kalau baduto kami tak sato

Nan takaba Palimo Gaga

Duo jo diri Sireno Nilam

Jikok ado namo nan samo

Rila jo maaf kami dimintak

Maklumlah kami nak randai

Umua nan balum satampuak pinang

Darah nan balum satahun jaguang

Aka balum pangalaman kurang

Gadang badan gadang dek lueh

Tolong dek sanak samparonokan

Buliah nak samo ka nan elok

Randai bamulai bacurito

Tanang dunsanak mandangakan 

2.      SIMARANTANG RANDAH

Nan tasabuik carito lamo

Panglimo gaga jo reno nilam 2x

Maibau duba … lang nan ba duo

            Langkok jo diri aciak menan (mangko dibu…kak lapiak pama… i… nan)

1.   Palimo Gaga Maimbau Dubalang Nan Baduo langkok aciak menan dibukak lapiak pamainan

Palimo gaga	:	Mano lah tuak leman jo galang sapik??? Kamano pulo kolah paja ko malala …. Tadi pagi bajanji disiko ka main koa jo Ciak menan ??? Lah jam sagiko tapi alum juo tibo sampai kini alum juo manjungua puncak iduang eee paja tu… Anak mudo nan ka maacuakan zaman Kok mangecek baduto-duto Kok janji mungkia-mungkia Kok dipicayo kianek Kok tibo talambek lambek Kok datang manyuruak-nyuruak (Maimbau … ) Tua leman…….. ??? Galang sapik ……???
Tuak Leman dan G.Sapik		G sapik : Man ? T lman  : apo pik G sapik : palimo lah manunggu man ? T lman  : tub a pik G sapik : anok se lah dulu T lman  : wak kajuikan nyo pik ? G sapik : jadih man T lman  : wak ang sabalah situ den sabalah siko G sapik : kok mati se tuan tu wak kajuk an  ba man ??? T lman  : rancak lah lai Wak ang ambiak bini e den ambiak anak. G. sapik : Tu ndak masuak man …binie lah gaek G sapik : aaaaaaaaaaaaaaaa ? P. gaga : hep . hep . hep. Kama kalian …. T .Leman  : ampuuuun tuannn …. Ampun …. Ko den mah tuan tuak leman
Galang Sapik	:	Ampunkan kami tuan panglimo, ampun baribu kali ampun, kami takuakan kapalo nan satu, kami unjuakan lutuaik nan duo, mamintak ampun bakeh tuan Tuan tutuah batang sibaransi Baro rang ambiak kakilangan Tuan bunuah kami ka mati Tuan juo nan kahilangan Ampunkan denai tuan palimo Bukannyo denai talambek disangajo Banyak rintangan nan dihadang Tantangan ka diri aciak menan Inyo katibo sabanta lai Saba lah tuan manantikan
Palimo gaga	:	Manolah kalian kaduonyo, mandanga rundingan dari kalian, sajuak rasonyo hati, sanang dalam pamikiran. Buliah nak ilang rusuah dalam hati Saba kito mananti …
Ciak Menan	:	Den sangko hari handak ka patang Kironyo hari lah sanjo rayo Den sangko palimo gaga ndak ka datang Kironyo lai datang juo
Palimo gaga	:	Mandaki jalan ka sirukam Handak ka pai ka sungai lasi Di Saok laweh mambali sapu tangan Lah dari tadi den nantikan Raso hanguih dalam hati Paneh kareh nan den tahankan Anak urang manggumpa banang Banang di gumpa dilepek lipek Kok dirantang  namuahnyo panjang Nak dipunta buliah nyo singkek Kito bukak lapiak pamainan Kini juo kito bamain
Ciak menan		Kok baitu kato palimo Nak den bukak lapiak pamainan Kini juo kito bamain Buliah nak tahu jantan batinonyo (Ciak Menan, Palimo Gaga , Galang Sapik , Tuak Leman Bermain Koa ) (Akhirnya ciak menan kalah main dengan palimo gaga sehingga aciak menan berhutang ke palimo gaga dan karena tidak sanggup membayar hutang sehingga mamak menjodohkan nilam dengan palimo gaga)

Dendang Bukik Tinggi

Hutang lah tumbuah salilik pinggang ndeh tuan oi

Kamalah badan ka batenggang

Kamanakan nan di gadaikan

Sanang nyo hati palimo gaga ndeh tuan oi

Rasolah bibia tapi cawan

Raso duduk di palaminan

                                        

2.   Palimo Gaga Ketempat Reno Nilam Untuk Membahas Pertunangannya Dengan Reno Nilam

Palimo Gaga	:	Diak kanduang sirano nilam, lah payah denai dek mancari, hilia kampuang mudiak kampuang, bukik tinggi lah denai daki, lurah nan dalam lah denai turuni. Nak urang pincuran tabik Nak ulam pucuak manjulai Disiko mah nilam kironyo
Reno Nilam		Ondeh tuan palimo gaga, tasirok darah di dado, tapacak paluah di kaniang, apokok sabab jo karanonyo, mangkok tuan datang kamari
Palimo Gaga		Diak kanduang balahan diri, jarek samato badan denai, limpapeh rumah nan gadang, sumarak anjuang paranginan Bukan kinari kinari sajo diak Kinari anak urang padang Bukan kamari kamari sajo diak Gadang mukasuik ka denai jalang Nak duo pantun sairiang danga dek nilam sabuah lai Singkarak batuang rang tarah Ditarah ateh tapi daun buruang lah tampak ka denai gatah Jinak alah ka tangan balum
Reno Nilam		Dikarek batuang rang tarah Ditareh ateh tapi daun Jikok buruang ka tuan gatah Buruang lah ado urang nan punyo.
Palimo Gaga		Diak kanduang si reno nilam Nak urang koto malanca Nan barumah dipariaman Kandak den palimo gaga Pantang di ambek ditagahkan
Reno Nilam		Ondeh tuan panglimo gaga, heran denai bukan ka palang, manga tuan bangih bana, sirawik tajam sabalah, talang di rimbo rang landuangkan, didahan buruang kanai gatah, manga kok tuan manangguangkan.
Palimo Gaga		Diak kanduang sireno nilam, indak kok adiak dapek kaba, iyo di bulan dahulu, nilam alah denai pinang, ka mamak nilam ka pancukupanan tunku tigo sajarangan, dibulan datang kabaraleknyo Sungguah samantang baitu, danga dek nilam denai katokan, Diak kanduang si reno nilam Urang mamikek udang lalu, Kanai kapitiang jo sirangkak, Urang mamikek jo balam mau Denai mamikek jo ameh perak
Reno Nilam		Ondeh tuan palimo gagah iyo pulo bak pantun urang Anak urang tanjuang barulak Barulak barulai pulo Tuan mamikek jo ameh perak Balam nak iyo jo suaso
Palimo Gaga		Diak kanduang si reno nilam, usah disingguang karuntuang miang denai, indak kok nilam dapek kaba, iyo di bulan dahulu, bahaso nilam alah denai pinang, ka mamak nilam ka pancukupan, tungku tigo sajarangan, dibulan datang ka baraleknyo Denai indak namuah kanai bak nanko, denai bari kaba ka mamak nilam, tangguang rasiko dek nilam surang Anak bincacak bincacau Anak singiang ngiang rimbo anak bingkatak kambiang hutan Denai bari kaba mamak si nilam, tangguang rasiko dek nilam surang, denai bajalan hanyo lai.

Palimo gaga mengadu kepado mamak si nilam, hati sakit, seorang panglimo gaga rang kaya, orang bagak dalam nagari, dihariaknyo mamak si nilam, diceritakan si nilam mancaci diri Palimo gaga, lalu menemui Reno Nilam.

Dendang Sapantun Limau Hanyuik

            Sakik hati palimo gaga diak kanduang oi

            Dihariaknyo mamak sinilam diak kanduang mamak sinialam

            Diak kanduang mamak sinilam

            Kaba baraliah ka aciak menan diak kanduang oi

            Dicari nilam maso itu diak kanduang randai lah jatuah

            Sinan tabukak kato kato

             

3.   Mamak Pergi Ketempat Nilam Setelah Palimo Gaga Mengadu Kepada Mamak

Ciak Menan		Nilam … !  o…. Nilam ? Nilam … !  o…. Nilam ? Nilam … !  o…. Nilam ?
		Yo sia tu….. ?
Ciak Menan		Mamak …..
Reno Nilam		ooo …. mamak, masuak lah mak ! Manolah ciak menan mamak denai, tasirok darah di dado, tapacak paluah badan diri, apokok  kaba jo barito, makonyo mamak datang kamari
Ciak Menan		Kamanakan denai si Reno Nilam, litak katampek mintak nasi, awih katampek mintak aia Mangkoknyo mamak datang kamari, mamak mandapek kato sadiah, kato di bao angin lalu, antah iyo antah indak, panglimo gagah datang kamamak, utang dek mamak manyampaikan.
Reno Nilam		Ondeh mamak janyo denai, tampek baiyo jo batido, tampek mangadu siang jo pagi, tantangan kato mamak nan tun, indak ado salah jo saseknyo, itulah kato nan sabananyo. Danga dek mamak nilam katokan Waktu nilam di tapian sadang manyasah kain jo baju tibo panglimo gaga maso itu inyo nan datang berang-berang dikatokan bahasonyo nilam alah batunangan jo tuan Palimo Gaga”
Ciak Menan		Reno nilam janyo mamak, katantangan di diri palimo gaga, lah sipeknyo kacaro itu, indaknyo pandai basilunak, indak pandai basilambuik, tapi Palimo Gaga hatinyo elok, mamak lah tau salamoko
Reno Nilam		Ondeh mamak janyo nilam, tapi samantan pun baitu indak patuik inyo bakato sarupo tu sabab denai ko anak gadih .
Ciak Menan		Reno nilam janyo mamak, usah itu kito rantang, jikok di rantang namuah nyo panjang, elok di puta naknyo singkek, kito ambiak sajo nan paralu, Danga dek nilam mamak katokan, iyo dipakan nan daulu palimo gaga datang ka rumah mamak inyo mintak di patunangkan jo kamanakan mamak reno nilam baa pikiran hati nilam ???
Reno Nilam		Ondeh mamak janyo nilam, jikok tuan Palimo gaga denai tak suko samiang juo, urang lingkareh dalam nagari, urang mamakan masak matah, urang barajo di hati, bajutan di mato urang, indak den takuik dek bagak urang, indak den harok di kayo urang, indak den suko saketek juo.
Ciak Menan		Reno nilam janyo mamak, danga dek nilam mamak katokan, usah maino ino urang usah mancaci caci urang, dek nilam cubo pikiakan,  mamak bautang sapanjang tahun, utang sapacik ka saganggam utang sameh 50 tail, kok indak nilam mamak runggukan jo apo utang ka mamak bayia, itu di mamak nan marusuah
Reno Nilam		Ondeh mamak janyo nilam ,urang nan arih bijaksano, utang mamak bayia dek mamak, utang nilam, nilam nan punyo.
Ciak Menan		Reno nilam janyo mamak, usah muluik talompek lompek, usah kato tadorong dorong, lawik sati rantau batuah, urang dunia banyak karamek. Dari ketek den gadangkan kini lah pandai malawan mamak kok indak namuah manuruik parentah usah bamamak juo ka diri denai carilah mamak ka urang lain. Kamanakan cilako indak mambaleh guno

Dendang Cupak Ambiak Lado

            Taibo hati … Reno nila…m

Dicari Bujang 

            Bujang baganto dimaso itu ….

            Dicari bujang, bujang baganto

            Randai lah jatuah yo lah tu kini 2x

           

4.      Reno Nilam Mancari Bujang Baganto

Reno Nilam	:	Ondeh tuan bujang baganto, lah panek nilam dek mancari, masuak kampuang kalua kampuang, masuak parak kalua parak Disiko tuan malah kironyo
Bj. Baganto		Manolah nilam janyo denai, tasirok darah di dado tapacak paluah di badan diri, apokok sabab karanonyo mangko nilam datang kamari
Reno Nilam		Ondeh tuan bujang baganto, tampek mangadu siang jo pagi, mangkonyo nilam datang kamari buruak untuang di badan diri.
Bujang baganto		Manolah nilam gadih nan jombang jarek samto palarai damam Sampaikan sajo baritonyo buliah nak sanang paratian
Reno Nilam		(NILAM MENANGIS) Jikok baitu kato tuan, bialakan nilam jalehkan bana, apo sabana kajadian, pihak di hari nan kapatang, mamak mananti ateh rumah, lalu barundiang maso itu, mamak mangatokan bakeh nilam, bahaso nilam alah batunangan jo tuan palimo gaga.
Bj. Baganto		Ha,,,ha,,, Mano nilam janyo denai ,,, kok iyo itu nan tajadi kabaa pulo janyo denai iko basuo bak pantun urang. Kasariak mambali dadiah Katalang mambaok jamba Iyo sarik baayam putiah Kok indak sikok alang manyemba
Reno Nilam	:	Tapi samantan pun baitu, tantang kato mamak itu, nilam tulak mantah mantah nilam katokan bahaso nilam alah batunagan, iyo jo badan diri tuan, tapi mamak katiko itu inyo berang indak kapalang, mahariak mahantam lantai, sampai kalua kato kato, bahaso mamak indak ka ba kamanakan bakeh nilam.
Bj. Baganto		Puyuah nak urang koto nopan baok bapikek malah daolu, guruah kok indak jadi hujan bumi jo langik dapek malu.
Reno Nilam	:	Padi sipuluik elok katapai, di bao urang ka pitalah, cinto ka tuan kok indak sampai, bialah mati bakalang tanah.
Bj. Baganto	:	Jikok baitu kato nilam lah sanang bana dalam hati, sajuak dalam pamikiran, Putiah kapeh lah dapek di like putiah hati kaba radaan kini baitu malah lai kapalang basah bialah mandi mandi di lereng bukik putuih mandi bagusuak daun pandan eloklah kito samo pai etan karanah rangkiang luluih di sinan kasiah kito sampaikan ba a fikiran hati nilam ???
Reno Nilam	:	Ondeh tuan bujang baganto, iyo pulo bak pantun urang Pado mananam lobak lambau Elok lah sawi di tugakan Pado mananam hati risau Elok nagari ditinggakan Kini juo kito bajalan Disitu hatinyo mangko sanang

Dendang Tanti Batanti

            Pado mananam lobak lambau

Eloklah sawi ditugakan

Pado Manahan hati risau

Elok nagari ditinggakan 2x

Alah bajalan bujang baganto

Duo jo diri sireno nilam

Etan ka ranah rangkiang luluih

Disinan kasiah disampaikan 2x

5.      Palimo Gaga Maimbau Dubalang Nan Baduo Untuk Mencari Bujang Baganto Membawa Sireno Nilam

Palimo Gaga		:	Mano tuan leman jo galang sapik, agak kamari kalian tagak, kito barundiang sakutiko. gadang niatan dalam hati, sarato mukasuik nan sangajo.
G. Sapik			Tuan kanduang Palimo gaga, apokok salah badan kami mangkok kami tuan panggia
Palimo Gaga			Mano tuak leman jo galang sapik indak kok datuak dapek kaba denai mandapek kaba angin kaba nan dari urang kampuang si bujang baganto inyolah lari lari nan indak surang sajo inyo mambaok si reno nilam pikia dek datuak tanntang itu sungguah malunyo badan diri.
G. Sapik			Kok baitu kato tuan, jatuahkanlah perintah ateh kami, jalehkan karajo kakami kakok Hitam kecek tuan den hitamkan Putiah kecek tuan den putiahkan Indak ka suruik salangkah juo
Palimo Gaga			Manolah pandeka nan baduo sadiokan karih pusako Pusako Niniak Dahulunyo Alah katarang itu dek kalian
G. Sapik			Kalau baitu kato tuan, kami Kami sadiokan karih kelok sambilan Pusako niniak dahulunyo Alah ka sanang hati tuan Kini pai tuan ??? (Palimo Gaga Barangkek Ke Hutan Tempat Bujang Baganto Bajalan Jo Reno Nilam)
Palimo Gaga			Mano tuak leman jo galang sapik, caliak suok jo kida, kok lalu bujang baganto, capek imbau ambo.
Tuak leman			Kok baitu kato tuan sugiro kami manyongsong tuan disiko bia denai situ tapi samantang pun baitu caliak juo kami dek tuan kami sonsong bana bujang baganto alah kasanang hati tuan
Palimo Gaga Membagi Tempat Untuak Mengintai Bujang Baganto
Tuak Leman			Pik ? ang cari disitu den disiko pai lah ang lai ….
G. Sapik			Yo ….. (Tuak leman dan G. sapik mencari bujang baganto, ternyata salah sasaran yang tertangkap tuak leman )
Tuak Leman			Ko  nyo tuan …. Dapek Bj. Baganto tuan
G. Sapik			Ko ambo leman … Galang sapik ….
Tuak Leman			Ang pik ? Kecek den bj.baganto tadi … A tu nyo tuak leman bj baganto Anok se lah ,,, Aaaaaaaaaaaaaaaaa Hep hep hep….. Manolah waang bujang baganto Hari kamih pasa sirukam Anak sikola pulang baduo Pulang baduo tangah hari Alah jaleh panglimo gaga jo si reno nilam dek bujang baganto babaok juo indak kok takuik badan kamati !!!
Bj. Baganto			Mano pandeka nan baduo alek mano nan bapakai limbago mano nan kalian tuang apokok salah badan denai mako dirimbo denai dihadang.
G. Sapik		:	Manolah waang bujang baganto, indak kok ang mandanga sajak tadi, alah jaleh nilam jo palimo gaga dek bujang baganto babao juo, indak katakuik badan ka mati, eloklah wa ang babaliak pulang sabalum denai berang bana
Bj. Baganto			Pancarinek di dalam aia Babungo magko babuah Elok-elok kalian balaia Lauik sati rantau batuah Urang dunia banyak kiramat.
Tuak Leman			Apo katenggang biduak pincalang angin barambuih tiang lah patah biduak die lo ka tapi pantai Apo ka tenggang tupai janjang rimbo hanguih kayu rang rambah kamano badan manggapai jikok busuak badan nan buruak. Ha,,, ha,,, ha,,,
Bj. Baganto.			Mano kalian nan baduo, usah kalian banyak carito, induak-induak awak kato urang, kok lai bapisak galembong kalian, bukaklah langkah dari sinan, nak denai iriangkan dari siko.
G. Sapik			Usah waang cancang kaladi Pandan di hulu rang laduangkan Usah wa’ang bakato duo kali Maramang bulu kuduak mandangakan Eloklah bujang babaliak pulang, tinggakan sinilam disiko, baitu hati kami mangko sanang, alah kajaleh itu di wa ang.
Bj. Baganto			Mano tuak leman jo galang sapik anak buah palimo gaga kalau iyo nilam denai tinggakan langkahi dulu bangkai denai baru nilam kalian bao.
G. Sapik		:	Kareh pulo kapalo wa’ang, nak marauang-rauang rang gaek wa’ang kamari, kok bacarai nyawo jo badan eloklah wa’ang babaliak pulang.
Bj. Baganto			Mano rang mudo janyo hambo, mandaki jalan kasirukam, manurun jalan tantang rimbo tabek, dagang di laia lai tak karam, konon kok balaia dalam tabek.
G. Sapik			Manolah wa’ang bujang baganto muluik wa’ang kalua sangek kasa kami kaluko indak wa’ang kana Alum tantu ang sia denai iko banamo sigalang sapik dalam silang denai manyapik dinan rami denai bagak dinan langang denai panakuik kini baitulah malah Eraklah langkah dari sinan nak denai nanti dari siko Hep … Hep … Hep Tolong leman …. Bagak kironyo man … Ampun …. Ampuun …..
6.      Bj. Baganto jo Galang Sapik, Tuak Leman Bacakak di Sipak Dari Balakang Bujang Baganto
Palimo Gaga			Manolah waang bujang baganto Pandai bana waang mambuang langkah Sia guru nan maaja dimano urang nan manunjuak an bia jo denai batantangan nak jaleh jantan jobatinonyo
Bj. Baganto			Mano lah tuan palimo gaga Sajak ketek denai lah tahu Tuan nan gadang dinagari Tuan juaro ditangah galanggang Tapi samantanpun baitu Kok kayo kayo diharato rampasan Kok gapuan maungguak lamak Wak gaek taruang asam Lah gaek salero tajam
Palimo Gaga			Manolah waang bujang baganto Alum tahu ang jo diri denai Aden nan bagala panglimo gaga Urang bagak ditangah koto  Aden juaro galanggang Indak paja ketek nan gadang sarawa Kandak den pantang indak balaku Hitam kecek den hitam Putiah kecek den putiah Nak tantu jantan jo batinonyo Ang rasoan lakek tangan den … Hep … (Panglimo menjerit kesakitan karena terkunci oleh Bujang baganto) Pandai bana waang mambuang langkah … Ang rasoan tangan den (Panglimo mengeluarkan karih patah sambilan) (Bujang baganto bisa membuang karih patah sembilan dari tangan palimo gaga, ketika palimo gaga di kunci dengan silat bujang baganto, tiba tiba galang sapik mengambil karih ditusukkan ke perut bujang baganto dari belakang)
Akhirnya Bujang Baganto terbunuh Oleh Palimo Gaga Dan Anak Buahnya Tuak Leman jo Galang Sapik Karna cinta reno nilam tulus kepada bujang baganto sehingga Reno Nilam Bunuh Diri Dengan Pisau Yang Ditusukkan Kepada Bujang Baganto
Reno Nilam	:		(Bj. Baganto Sekarat) Tuan…. Tuan …. Tuan ….. Jan tinggakan denai tuan ….. Kama badan ka manadu tuan … Denai indak nio palimo gaga tuan …. Jarajak dibukik taban Simantuang dibukik tinggi Tampek bapijak nan alah taban Kamano badan manggapai lai Tuan …. Tuan …. (Bj. Baganto mati) Tuan …. Tuan …. Mati tuan mati basabek Mati tuan karano denai Indak nilam malawan mamak Indak nilam manantang mamak Cinto nilam ka bj baganto Indak palimo gaga (Reno Nilam ma ambiak pisau yg tertusuk di perut Bj. Baganto) Pado rumpik elok lah padi Pado hiduik elok lah mati Surang tuan mati Baduo jo diri denai ….

Simarantang Tinggi

Iyo ……

Jikok ado jarum nan patah

Usah disimpan dalam peti

Buang kan sajo ka pumatang

Jikok ado kato nan salah

Usah disimpan dalam hati

Buangkan sajo ka bulakang sanak o……… oi

Iyo……..

Rancak nagari dek panghulu

Jalan undang undang dek dubalang

Randai sagitu malah dulu

Talempong mairiang dibalakang