CERITA RANDAI SABAI NAN ALUIH FULL

SILAHKAN SUBSCRIBE JIKA INFO INI BERMANFAAT 

ABAIKAN JIKA TIDAK

NASKAH CERITA RANDAI

SABAI NAN ALUIH

KESENIAN TRADISIONAL MINANGKABAU

“SANGGAR MUDO BARAPI”

Kota Solok

PEMERAN :

1.      SABAI NAN ALUH

2.      SADUN SARIBAI (Ibunda Sabai Nan Aluih)

3.      RAJO BABANDIANG (Ayahanda SabaiNan Aluih)

4.      MANGKUTAK ALAM (Adak laki-laki Sabai Nan Aluih)

5.      RAJO NAN PANJANG

6.      DATUAK KALEK (Utusan Rajo Nan Panjang)

7.      PANDEKA 1 (Anak buah Rajo Nan Panjang)

8.      PANDEKA 2 (Anak buah Rajo Nan Panjang)

9.      PANYABIKRUMPUIK

SYNOPSIS

Tasabuik kaba maso dahulu Kaba banamo Sabai Nan Aluih Curito urang sagalo koto Dendang urang sagalo kampuang, Adopun samaso nan bak kian Iyo diranah padang tarok, Banamo Tuanku Rajo Babandiang Ayah dek upiak sabai Nan Aluih Bapak dek buyuang Mangkutak Alam Junjuangan dek aciek Sadun Saribai.

Tantangan diri Sabai Nan Aluih Lah gadih gadangnyo tu kini, Manjadi bungo dalam kampuang Limpapeh rumah nan gadang surak anjuang paranginan, Pamenan mato pagi jo patang, Paubek jariah palarai damam, Balam tongga jajran bundo, Pautan hati rang mudo-mudo.

Tasabuik diri Rajo Nan Panjang Manjadi rajo di Payokumbuah Urang sati jo kiramaik, Taniak nak mampasuntiang diri sabai nan aluih, Arok ka pusako jo taranak,  Bak ado udang dibaliak batu, Tantangan Rajo babandiang Duo jo Rajo Nan Panjang bakawan arek sajak dahulu. Sajak barumue sapuluah tahun Sampai manjadi bujang matah, kini taragak pulo maminang sabai nan aluih anak dari Rajo Babandiang.

Bagai mana ceritanya mari kita saksikan penampilan dari group randai …………………

PERMULAAN Randai masuk di iring dengan calempong 1.      DAYANGDAINI Mano Sagalo Niniak jo Mamak Sarato sanak Jo Sudaro2x Rila jo Maaf  nan kami mintak Randai di mulai langkah di angkek2x A.    Randai membentuk lingkaran SEKAPUR SIRIH Assalamualaikum pamulo pambukak kato Bismillah kato dimulai Salam jo sambah disampaikan Bagai awa pamulai kato Sipatan rundiang  pandahuluan Salam taunjuak sanak sudaro Iyo kaganti bajawek tangan Kami nak randai Mudo Barapi Nan talatak Ditanah Garam Dalam daerah Kota Solok Banda urang kami bandakan Banda nak lalu kamuaro Kaba urang kami kabakan Kalau baduto kami tak sato Nan takaba Palimo Gaga Duo jo diri Sireno Nilam Jikok ado namo nan samo Rila jo maaf kami dimintak Maklumlah kami nak randai Umua nan balum satampuak pinang Darah nan balum satahun jaguang Aka balum pangalaman kurang Gadang badan gadang dek lueh Tolong dek sanak samparonokan Buliah nak samo ka nan elok Randai bamulai bacurito Tanang dunsanak mandangakan
2.      SIMARANTANG RANDAH Balai-balai Ba Simpang Tigo Sasimpang Jalan Ka Tapian Sasimpang Jalan Ka Tapian Nan tasabuik carito lamo Sabai nan aluih rang imbaukan Sabai nan aluih rang imbaukan
DATUK KALEK		(tagak mambao siriah di carano) Manolah Tuanku Rajo Babandiang (Rajo Babandiang tagak) Denai banamo Datuak Kalek Ampunkan denai dek Tuanku Denai disuruh Rajo Nan Panjang Mambao siriah jo carano Sarato pinang salangkoknyo
RAJO BABANDIANG	:	Datuak Kalek janyo denai Tarangkan bana jaleh-jaleh Apo mukasuik datang kamari Buliah sanang dalam hati Sajuak di dalam kiro-kiro
DATUK KALEK	:	Mangkonyo denai datang kamari Untuak maminang Sabai Nan Aluih Dek inyo indak ba mamak lai Pado tuanku rundiang salasai
RAJO BABANDIANG	:	Kalau bak itu kato Datuak Manunggu Datuak molah dulu Kato surang denai buleti Kato basamo denai paiyokan Dipaiyokan ka mandeh dek si Sabai
DATUK KALEK	:	Asai lai dapek kain putih Bialah labiah pangguntiangan Asa kandak lai ka buliah Lamo jo lambek denai nantikan
Dendang Adok ka diri Rajo Babandiang Paik nan alun baluahan Manih nan alun di luluanyo Batangguah inyo nak barundiang Bulek aie dek pambuluah Bulek kato dek mupakaik Mupakaik jo Sadun Saribai Nan manjadi mandeh dek si Sabai
RAJO BABANDIANG	:	Manolah adiak denai Sadun Saribai Mande dek diri Sabai Nan Aluih Ado nan tapikie dek badan diri denai Iyolah tantangan Sabai Nan Aluih Lah gadih gadang nyo tu kini Lah jombang pulo tampak di urang Kawannyo nan samo gadang Lah baranak kasadonyo Kok kito carikan pulo ka junjuangannyo Baa pandapek adiak tantang itu
SADUN SARIBAI	:	Lai kok ado ka junjuangannyo Nan tampak dek tuanku Katokan molah pado denai
RAJO BABANDIANG	:	Kok nan tampak iyolah Rajo Nan Panjang Nan manjadi Rajo di Payokumbuah Urang kayo sati pulo Iyo kawan salapiak sakatiduran Katiko kami ketek-ketek. Datuak Kalek lah datang mambao siriah salangkoknyo
SADUN SARIBAI	:	Rajo nan Panjang ? Rajo Nan Panjang kato tuanku? Tantangan diri Rajo Nan Panjang Inyo barajo di hatinyo Inyo basutan di matonyo Bininyo banyak bukan surang Tiok lekok tiok baranak! Kini anak kito pulo dipinangnyo Nan samo gadang jo cucunyo? Bialah denai tak baminantu Rajo Bialah denai tak baminantu kayo Bialah minantu denai tak babanso Elok budi sarato baso Baliak bicaro ka bakeh tuan
RAJO BABANDIANG	:	Jikok baitu kato adiak Denai lah maklum tantang itu
SADUN SARIBAI	:	Katokan molah ka Datuak Kalek Baso kandaknyo indak dibari Elok-elok tuan barundiang Pandai-pandai tuan bakato Usah tasingguang hati urang
RAJO BABANDIANG	:	Simpan rasio elok-elok Kok tau urang di kampuang Awak ko dikatokan urang pamiliah
SADUN SARIBAI	:	Pitaruah tuan ambo pacik arek Alah ka sanang tu dek tuanku
Dendang Kato putuih rundiang salasai Putuih tak dapek di sambuang lai Bulek hatinyo Sadun Saribai Manulak pinangan ka diri Sabai Dek mananti lamo jo lambek Tibo garak ka Datuak Kalek Kandak nan indak ka dibari Inyolah cameh dalam hati
RAJO BABANDIANG	:	Manolah Datuak Kalek janyo denai. (Datuk Kalek tagak) Anak urang kabun timbakau Nak lalu ka panyalaian Lai mah Datuak nak mancakau Manga indak jo umpan nan sasuai Nak duo pantun sairiang. Anak urang kubang baraliah Nak lalu ka Tabek Patah Bukannyo denai urang pamiliah Manga dek indak mambao gatah.
DATUK KALEK	:	Anak urang di Tabek Patah Nak lalu ka Tanjuang Alam Denai nan indak mambao gatah Denai tembak sajo jo sumpitan
RAJO BABANDIANG	:	Anak urang di Tanjuang Alam Nak lalu ka Bukik Apik Datuak manembak jo sumpitan Buruang mambubuang kateh langik
DATUK KALEK	:	Anak urang di Bukik Apik Nak lalu ka Pangkalan Buruang mambubuang kateh langik Denai malapeh asok itam Di sinan buruang dapek dek denai!
RAJO BABANDIANG	:	Anak urang di Pangkalan Nak lalu ka Tanjuang Balik Datuak malepeh asok itam Buruang manyilam masuak lawuik Baa ka aka Datuak lai !
DATUK KALEK	:	Anak urang di Tanjuang Balik Nak lalu ka Sungai Landik Buruang manyilam masuak lawuik Denai malapeh jo jalo sisik Di sinan buruang dapek dek denai !
RAJO BABANDIANG	:	Anak urang di Sungai Landik Nak lalu ka Bangkahulu Datuak malapeh jo jalo sisik Buruang manyuruak ka guo batu Di sinan buruang makonyo ilang ! Baa ka aka Datuak lai !
DATUK KALEK	:	Anak urang di Bangkahulu Nak lalu ka Sungai Ngiang Buruang manyuruak ka guo batu Denai manubo sampai paniang Di sinan buruang dapek dek denai Den tangkok den bao pulang Eten ka rumah Rajo Nan Panjang Barunyo sanang hati denai
RAJO BABANDIANG :	:	Manolah Datuak janyo denai Usahlah kito tingkah batingkah Kok nan pintak dari Datuak Iyo tak dapek musim bak kini Tantangan diri Sabai Nan Aluih Inyo nan ketek mudo matah Umuenyo balun satahun jaguang Darah nan balun satampuak pinang Kini baitu molah dek Datuak Babaliak molah datuak pulang Sampaikan pado Rajo Nan Panjang Baso kandaknyo indak babari
DATUK KALEK	:	Kalau baitu kato tuanku Indak sanang di dalam hati Indak sajuak di dalam kiro-kiro Kini baitu molah dek Tuanku Tamui molah Rajo Nan Panjang Eten di ladang pataunan Di sikaduduak bapilin tigo Di sinan gantiang nak nyo putuih Di sinan biang nak nyo tabuak
RAJO BABANDIANG	:	Kurang laweh tapak tangan Jo niru denai tampuangkan Bia rambuik di balah tujuah Denai tak takuik jo Rajo Nan Panjang
DATUK KALEK	:	Ampunlah denai dek tuanku Usah denai bari ba utang Dari dunia sampai akhirat Kini baitu molah dek Tuanku Lapehlah denai nan jo do’a Buliah salamaik babaliak pulang
Dendang Alah bajalan Datuak Kalek Iyo ka ranah Limo Puluah Inyo bajalan bagulambek Kalam nan indah bapanyuluah Di tampuah jalan nan panjang Langkah salangkah cameh sadapo Takana kato Rajo Nan Panjang Inyo tagamang di pintu koto Kaba baraliah hanyo lai Sungguah baraliah sinan juo Adok ka diri Rajo Nan Panjang Rajo kuaso di Payakumbuah
DATUK KALEK	:	Manolah tuanku Rajo Nan Panjang Nan disuruah denai lah pai Iyo ka ranah Padang Tarok Ka rumah Rajo Babandiang Mambao siriah jo carano Sarato pinang salangkoknyo Tapi baalah mangatokannyo Nan adaik lah denai isi Limbago lah denai tuang Tantangan pintak dari kito Indak nyo bari dek Rajo Babandiang Pulang maklum pado tuanku
RAJO NAN PANJANG	:	(TARABO) Indak ko nyo tau di diri denai Iko nyo nan banamo Rajo Nan Panjang Nan kuaso di Payakumbuah Pantang kandak indak ka dapek Nan sakarang kini nangko Japuik pandeka nan baduo Japuik tabao kini-kini Usah Datuak batangguah juo ! Barangkek !
PANDEKA I:		Ampun denai dek tuanku Ampun baribu kali ampun Mandanga imbau dari tuanku Tasirok darah di dado Gumanta sabatang tubuah Lunak sagalo pasandian Lungga jo putuih tali sarawa Taroroh sampai ka lutuik
RAJO NAN PANJANG	:	Usah kalian ba olok-olok ! Mangkonyo pandeka denai imbau Denai ka manamui Rajo Babandiang Eten di ladang Pataunan Di sawah nan ketek-ketek Di si kaduduak bapilin tigo Kok tumbuah silang jo salisiah Kalian molah nan manolongkan
PANDEKA II	:	Kalau baitu kato tuanku Kami lah maklum tantang itu Iyo bak kato urang juo Kok jariah tantangan buliah Payah tantangan labo Pulang maklum pado tuanku
RAJO NAN PANJANG	:	Kok itu nan kalian sabuik Alun takilek lah bakalam tu mah pandeka
Dendang Kaba baraliah hanyo lai Sungguah baraliah sinan juo Tantangan diri Rajo Babandiang Pai manamui Rajo Nan Panjang Dijapuik molah Mangkutak Alam Anak kasayangan dek ayahnyo Di imbau pulo Sabai Nan Aluih Buah hati limpo bakuruang
MANGKUTAK	:	Manolah ayah janyo denai Liek lah dek ayah layang-layang denai Ikue nyo panjang jelo bajelo Barakek jo karateh talue Badanguang-danguang di kapalo Bapantang kalah di galanggang Kini baitu molah dek ayah Bari izin denai pai bamain
RAJO BABANDIANG	:	Anak kanduang Mangkutak Alam Kok balayang-layang ka anak sabuik Labiah dari itu ayah bari Namun samantangpun baitu Jagolah diri elok-elok Pandai-pandai bagaue samo gadang Lawan nan usah anak cari Basuo pantang diilakkan
MANGKUTAK :		Kalau baitu kato ayah Lah sanang di dalam hati sajuak dalam pamikiran
RAJO BABANDIANG :		Anak kanduang Sabai Nan Aluih Manga anak mangko bamanuang Adokoh anak sakik jo damam Kok sakik ayah carikan ubek Kok damam ayah carikan tawa
SABAI NAN ALUIH:		Mangkonyo Sabai dek bamanuang Sabai ba mimpi malam tadi Ayam kinantan raso lah mati Kabau gadang raso lah ilang Junjuangan siriah raso lah rabah Lumbuang padi raso tabaka
RAJO BABANDIANG :		Usah anak barusuah hati Bukan mimpi buruak tu nak kanduang Rasian elok tu mah kironyo Dangakan dek anak ayah tarangkan Ayam kinantan rasolah mati Tando Mangkutak di pinang urang Kabau gadang raso lah hilang Tando taranak ka manjadi Junjungan siriah raso lah rabah Tando karakok ka manjadi Lumbuang padi raso tabaka Tandonyo padi ka manjadi
SABAI NAN ALUIH:		Aie manyuruak kato Sabai Bakelok juo kato ayah Mimpi buruak kato sabai Elok juo kato ayah
RAJO BABANDIANG :		Anak kanduang Sabai Nan Aluih Ayah nak bajalan pai ka pakan Pakan nyo rami kato urang Bari izin ayah dek anak kanduang Lapehlah ayah pai bajalan Mambali siriah jo timbakau
SABAI NAN ALUIH:		Sabai tarah indak ta tarah Bak manarah batang sampie Dipapek juo indak nan jadi Sabai tagah indak ta tagah Bak managah aie hilie Sabai lapeh jo ibo hati
RAJO BABANDIANG :		Sabalun ayah pai bajalan Elok dangakan pasan ayah Awak iduik bakato-kato Kato tabagi ampek pakaro Partamo kato nan mandaki Kaduo kato nan mandata Ka tigo kato nan manurun Ka ampek kato nan malereang Tantangan kato nan mandaki Bakato kapado nan tuo-tuo Tantangan kato nan mandata Bakato ka kawan samo gadang Tantangan kato nan manurun Bakato kapado anak-anak Tantangan kato nan malereng Tahu di ereng dengan gendeang Kok tabagi kato ampek pakaro Sipaik anak gadih tabagi ampek juo Partamo gadih layang-layang Kaduo gadih langau ijau Katigo gadih ayam kinantan Ka ampek gadih bapusako Tantangan gadih layang-layang Lah dareh candonyo angin Bara lenggok nan jo goyang Banang habih indak dikana Usah dipakai sipaik nantun Gadih cilako tu namonyo Tantangan gadih langau ijau Mandanguang ka ilie Mandanguang ka mudiak Ka ilie tak tantu ka di japuik Ka mudiak tak tantu ka dibao Usah dipakai sipaik nantun Gadih cilako tu namonyo Tantangan gadih ayam kinantan Lah siang candonyo hari Lah tabukak pintu kandang Lalu malompek inyo kalua Kukuak darai-badarai Musang ka manangkok indak tau Usah di pakai sipaik nantun Tantangan gadih bapusako Karajo manyulam jo manjaik Diam di ateh anjuang Kamudiak saimbauan ayah Ka ilie saimbauan mandeh Kamudiak tantu ka dijapuik Ka ilie tantu ka dibao Itulah sipaik nan ka anak pakai Kok nyampang ayah indak pulang Carilah ayah ka Payakumbuah Mintaklah karih dari mandeh Karih pusako jo badia balansa Karih sati kiramaik pulo Jajak di tikam mati juo
SABAI NAN ALUIH:		Kalau bai tu kato ayah Sagalo pasan jo umanaik Indak ka Sabai lupokan
RAJO BABANDIANG :		Tinggalah anak di nan sanang Ayah bajalan hanyo lai
Dendang Alah bajalan Rajo Babandiang Manamui Rajo Nan Panjang Iyo di ladang pataunan Di sikaduduak bapilin tigo Dek karuah sajak dari hulu Busuak nan sajak dari pangka Kawan lah barubah manjadi lawan Sawah lah indak ba pamatang Sadang lah bunta bayang-bayang Sadang langang urang di kampuang Ladang pahaunan jadi galanggang Rajo Babandiang jo Rajo Nan Panjang
RAJO NAN PANJANG :		Bareh sipuluik dalam kuali Usah dilatak dalam lalang Ganjue suruik tuan kumbali Kalau indak nyao malayang
RAJO BABANDIANG :		Mano tuanku janyo denai Usah hati taburu bana Eloklah kito duduak daulu Ganti marokok agak sabatang
RAJO NAN PANJANG :		Mano tuanku Rajo Babandiang Tantangan pintak dari denai Manga ditulak mantah-mantah Malu denai ka urang banyak Malu kamano denai suruakkan Kini baitu molah dek tuanku Elok sarahkan Sabai pado denai Pado manyasa kamudian
RAJO BABANDIANG :		Indak ko nyo tau di diri tuanku Awak lah gaek anak urang pulo kadipinang
RAJO NAN PANJANG :		Iyo sabana kareh hati tuanku Lai ko lamak juo buah jirami Indak ko ibo jo bini rancak ka manjadi rando Anak nan indak ka bapak lai Elok barikan Sabai pado denai
RAJO BABANDIANG :		Langkahkan maik den dulu Baru nyo dapek Sabai Nan Aluih
RAJO NAN PANJANG :		Pucuak di cinto ulam tibo Sumue di kali aie datang Denai lah taniaik nan bak kian Arak lah langkah dek tuanku Nak denai iriangkan dari siko
SABALUM MULAI BACAKAK RAJO BABANDIANG JO RAJO NAN PANJANG INYO BASALAM LABIAH DULU. SUDAH TU MULAI BASILEK. RAJO NAN PANJANG KEWALAHAN. RAJO NAN PANJANG; E, pandeka! Tagak juo baru lai! Tolong waden capek! Patigokan! Capeklah! KEMUDIAN, PANDEKA I JO PENDEKA II IKUIK BASILEK MELAWAN RAJO BABANDIANG. RAJO NAN PANJANG MENGERANG KESAKITAN. KEMUDIAN BERDIRI LAGI. IKUT MENGEROYOK RAJO BABANDIANG. TAJADI SILEK CIEK LAWAN TIGO. KASUDAHNNYO.. TATIKAM RAJO BABANDIANG DAN MENINGGAL
PANYABIK RUMPUIK	:	Aciak denai Sabai Nan Aluih Kutiko denai sadang manyabik rumpuik Tampaklah urang sadang bacakak Denai maliek dari jauh Ruponyo ayah aciak dipatigokan dek rang pandeka Ten di sawah nan ketek-ketek
SABAI NAN ALUIH:		Ondeh buyuang panyabik rumpuik Cubo ulang sakali lai
PANYABIK RUMPUIK:		Usah diulang duo kali Maramang bulu kuduak ko dibueknyo Ayah aciak tabujue jadi maik
SABAI NAN ALUIH:		Ayah …. Ayah …. Jan tinggakan sabai yah …. Aie manyuruak kato Sabai Bakelok juo janyo ayah Mimpi buruak kato Sabai Nan elok juo kato ayah Kironyo iko malah nan tajadi Ayah … Manga ayah tinggakan denai yah Ayah kanduang di badan sabai Pusek jalo tumpunan ikan Ayah ……….. Gadang salero rajo nan panjang Tipih karih ujuang ba taji Den ndak takuik nyao malayang Nyao ayah den bayia kini Den sasok darah rajo nan panjang
SABAI NAN ALUIH MANCARI RAJO NAN PANJANG Dendang

RAJO NAN PANJANG		Oi sabai nan elok rupo jarek mato palarai damam disiko adiak malah kironyo
SABAI NAN ALUIH		Tuan rajo nan panjang malah kironyo Lah panek denai manunggu Tuan nan indak kunjuang tibo Kiniko baru kito batamu Den sangko tuan bahati jo bajantuang Kironyo manuhuak kawan sairiang
RAJO NAN PANJANG		Sabai nan aluih janyo denai Danga dek adiak denai katokan Ayam kuriak rambaian taduang ikue manjelo masuak padi Ambiak tampuruang bari makan tujuah daerah dalam kampuang Adiak surang nan tapatan hati Nan lain buliah denai haramkan Kok dapek karambia puyuah diak den tanam di pamatang babuah labek pado patai kok dapek kasiah nan sungguah diak den gungguang den baok tabang satapak haram kabacarai
SABAI NAN ALUIH		Ondeh tuan rajo nan panjang Kalau baitu kato tuan Iyo pulo bak papatah urang Usah disabik padi salibu Kok di sabik luko lah kaki Denai maliek dalam saribu hanyo Tuan tampak hati Tapi  samantangpun baitu Tuan nan pandai bamanih muluik Pandai manggunting dalam lipatan Urang di hadang di tangah jalan Sampai tabunuah ayah denai
RAJO NAN PANJANG		Ondeh adiak sabai nan aluih Usah dilalai diabaian Kandak di hati kalau di tahan Namuah marompak mambunuah badan Kok mati bana ayah adiak den kan lai kagantinyo Kok dapek kito basandiang diak Bara kasanang kiro kiro Maklum lah sabai tantang itu
SABAI NAN ALUIH		Kalau baitu kato tuan  indaknyo sanang dalam hati Indaknyo sajuak di kiro kiro Adaik di dunia baleh mambaleh Utang ameh baia jo ameh Utang nyawo baie jo nyawo
RAJO NAN PANJANG		Adiak denai sabai nan aluih Usah mangecek tadorong dorong Urang didunie banyak kiramaik Agak kato kalau mangecek diak Awak nan ketek mudo matah
SABAI NAN ALUIH		Samantang denai parampuan nan dikatokan urang batulang lamah den Tak takuik nyao malayang sabalum tatuntuk baleh ayah
RAJO NAN PANJANG		Sabana kareh hati kau Sadang kan ayah kau urang nan sati Lai mati tasingguang dek tangan den Konon pulo dek kau Aaaaaaaaaaaaah………… Susah den mangatokannyo Kau kajadi bini den bagai
SABAI NAN ALUIH		Oi tuan rajo nan panjang Dek denai kajadi garah dek tuan jadi iyo bana disinan sangketo mangko tajadi
RAJO NAN PANJANG		Adiak denai sabai nan aluih Mandanga kato nan bak kian Sanang rasonyo dalam hati Sajuak dalam pamikiran Kini baitu molah dek adiak Molah kito karumah baa pandapek hati adiak
SABAI NAN ALUIH		Kalau baitu kato tuan Dahulu malah tuan salangkah …. Denai manuruik dari balakang
SABAI MENIKAM RAJO NAN PANJANG DARI BELAKANG TAPI GAGAL RAJO NAN PANJANG MENGETAHUI GERAK GERIK SABAI NAN ALUIHG
		Eeeeeeeee Bahayo bana kau sabai Kau cido den Lah habih sayang banci mairiang Indak lalu dandang di aia Di gurun den tanjakan Rasoan dek kau makan tangan den ….. (Rajo nan panjang bacakak jo sabai nan alui akhirnya sabai berhasil menikam rajo nan panjang sehingga rajo nan panjang mati ditusuk pisau pusaka dari ayahnya)
SABAI NAN ALUIH		Lah mati rajo nan panjang Mati tabunuah di tangan sabai Panjang umua manyusah urang Disitu hati mangko sanang
3.      SIMARANTANG TINGGI Iyo …. Jikok ado jarum nan patah Usah disimpan dalam peti buangkan sajo ka pamatang jikok ado kato nan salah usah disimpan dalam hati buangkan sajo ka bulakang  sanak ooooooo iiiiii Iyo …… Banda urang kami bandakan Banda nak urang tangah koto Bungo rayo tumbuah di ilaman Kaba urang kami kabakan Kok salah kami ndak sato Rila jo maaf disampaikan sanak ooooooiiiiiiii