NASKAH CERITA RANDAI SABAI NAN ALUIH

NASKAH CERITA RANDAI

SABAI NAN ALUIH

Oleh:

ERIK YONANDA. S.Pd.I

Sanggar Mudo Barapi Kota Solok

KESENIAN TRADISIONAL MINANGKABAU

“SANGGAR MUDO BARAPI”

Kota Solok

Pemeran :

1.      Rajo babandiang

2.      Rajo nan panjang

3.      Sabai nan aluih

4.      Pandeka 1

5.      Pandeka 2

6.      Pandeka 3

7.      Pandeka 4

SEKAPUR SIRIH

Assalamualaikum pamulo pambukak kato
Bismillah kato dimulai

Salam jo sambah disampaikan

Bagai awa pamulai kato

Sipatan rundiang  pandahuluan

Salam taunjuak sanak sudaro

Iyo kaganti bajawek tangan

Kami nak randai ……..

Nan talatak ……….

Dalam daerah Kota Solok

Banda urang kami bandakan

Banda nak lalu kamuaro

Kaba urang kami kabakan

Kalau baduto kami tak sato

Nan takaba ………………….

Duo jo diri ………………..

Jikok ado namo nan samo

Rila jo maaf kami dimintak

Maklumlah kami nak randai

Umua nan balum satampuak pinang

Darah nan balum satahun jaguang

Aka balum pangalaman kurang

Gadang badan gadang dek lueh

Tolong dek sanak samparonokan

Buliah nak samo ka nan elok

Randai bamulai bacurito

Tanang dunsanak mandangakan 

1.   DAYANGDAINI

Mano Sagalo Niniak jo Mamak

Sarato sanak Jo Sudaro

Rila jo Maaf Kasadonyo

Jari Sapuluah Kami Susun

Sambah Jo Randai

Dibaok Tagak

2.   SIMARANTANG

Balai-balai Ba Simpang Tigo

Sasimpang Jalan Ka Tapian 2X

Sasimpang Jalan Ka Tapian

Nan di sabuik curito lamo

Sabai nan aluih rang imbaukan 2x

Sabai nan aluih rang imbaukan

PANDEKA 1 BAKAWAN JO PANDEKA 2		Pandeka 1: Pandeka ………. ??? oooo pandeka…. Pandeka 2: apo dek ang lai … Pandeka 1: mangapo pandeka tu ??? Pandeka 2: sadang manga den Nampak dek ang … Pandeka 1:  bakoa wak lai ??? Pandeka 2: bilo Pandeka 1: bisuak… he …. Tantu lah kini pandeka. Pandeka 2: lai bapitih ang ??? Pandeka1: tanang se lah pandeka Pandeka 2: a disitu se wak main a, di pondok ketek tu a … (Pandeka 1 dan 2 sadang bahampok di pondok ketek)
Tibo pandeka 3 jo 4
PANDEKA 3 BAKAWAN JO PANDEKA 4		Pandeka 3 : Hoi …. Pandeka nan baduo, bahampok juo karajo kalian, indak kok dikana dirumah anak alum makan? Pikia pandeka. Hiduik tambah sarik kini pandeka. Pandeka 4 : dari dulu pandeka indak juo barubah parangi nyo do pandeka. Pandeka 3: iyo pandeka…. bahampok ka bahampok juo karajoe pandeka, anak dirumah alah marauang indak makan, inyo disiko bahampok, indak kolah ka berang bini dirumah pandeka.
PANDEKA 1 BAKAWAN JO PANDEKA 2		Pandeka 1: pandeka wak digunjiangan dek paja nan baduo tu pandeka Pandeka 2 : saba pandeka, Woi pandeka nan baduo…. Usah muluik talompek lompek, usah kato tadorong dorong, lawik sati rantau batuah, urang dunia banyak karamek. Kalau ambo paratian dari tadi kalian alah manyingguang karuntuang miang denai. Pandeka 2: iyo pandeka, Kalau ambo paratian pulo pandeka paja ko Nan indak indak e karajo e pandeka Samo jo induak-induak pandeka, Kareta mandaki angok e nan sasak, Itiak batulua ikua nan padiah, ndak masuak mode iko do pandeka   Pandeka 1 : Manolah wa’ang pandeka hanyuik muluik wa’ang kalua sangek kasa, kami kaluko indak wa’ang kana, kini baitulah malah dek wak ang , mari kito cubo agak sabanta, sambia mambuang-buang langkah, sambia mangaluaan paluah buruak, eraklah langkah dari sinan, nak denai nanti dari siko
PANDEKA 3 BAKAWAN JO PANDEKA 4		Pandeka hanyuik : Kini baitu malah lai, Alum tahu ang jo diri denai, Aden nan bagala pandeka hanyuik Urang bagak ditangah koto Nan juaro tangah galanggang Hitam kecek den hitam Putiah kecek den putiah Nan elok den katoan buruak juo kato ang Buliah Nak tantu jantan jo batinonyo Bukak langkah dari sinan nak den erak dari siko Pandeka 4 : agiah pandeka…

Pandeka 2 dan 3 bacakak tapi di larai dek pandeka 1 dan 4

PANDEKA 1 BAKAWAN JO PANDEKA 2		Pandeka 1 ; Alah alah pandeka, saba pandeka, awak badunsanak pandeka  ndak buliah bacakak-cakak. Kini baitu pandeka Apo mukasuik pandeka dantang ka siko ?
PANDEKA 3 BAKAWAN JO PANDEKA 4		Itu nyo pandeka aaa Ambo kamari mambaok kaba barito pandeka Kaba barito Tantangan rajo babandiang jo rajo nan panjang Rj. Nan babandiang kito kan samo tahu pandeka   Inyo punyo bini, punyo anak sabai nan aluih nan rancak tu pandeka a Rajo nan panjang nak maminang sabai nan aluih pandeka Tapi pandeka tantangan si sabai kito kan alah samo tahu Bak bulan ampek baleh pandeka Alisnyo babarih bak co samuik babarih pandeka Pipinyo merah pandeka Kulik putiah bantuak rancak Bungo Kampuang Dalam Nagari pandeka Tapi pandeka tantangan rundiangan nan tun pandeka rajo babandiang inyo indak ka tuju pandeka. Kito kan samo tahu pandeka Rajo nan panjang tiok kampuang tiok babini Tiok kampuang tiok baranak Kini pandeka si sabai lo nan ka nyo pinang pandeka Indak masuak do pandeka Alah sapangkek jo cucunyo pandeka Ado ciek lai kaba barito pandeka Rajo nan panjang nyo mintak batamu jo rajo nan babandiang pandeka Disawah ketek ketek pandeka Dikampuang bapilin tigo pandeka Kini baitu pandeka kito caliak ?

DENDANG

Karuah nan sajak dari hulu
Busuak nan sajak dari pangka
Kawan barubah manjadi lawan
Sawah nan indak ba pamatang

Sadanglah tagak bayang-bayang
Sadang langang urang dikampuang
Ladang pahaunan jadi galanggang
Rajo Babandiang jo Rajo Nan Panjang

RAJO NAN PANJANG		Manolah tuan rajo babandiang Lai mah tuan datang kamari Den sangko kulik tak basandiang tuan Kironyo putiah tampak ragi Dipakan kalamari Kandak den ba kok batulak ? Jalehkan malah kini kini Kok lai tibo pado ranah pihak badan diri denai Batampuak buliah di jinjiang Buliah den ampiang picak picak Buliah den giliang bulek bulek Buliak nan tinggi den rantangkan Buliah nan hitam den putiahkan Kini baitu hanyo lai Pado manyasa kamudian Sarahkan sabai pado denai Pado buruak nan tasuo
RAJO BABANDIANG		Manolah tuan rajo nan panjang Jaan tuan diagah bayang Usah di ulang duo kali Diranah tuan tuan nan gadang Dilua indak nampak lai Tantangan kini si sabai nan tuan kandak Usah itu tuan sabuik Elok nan lain ka tuan cari
RAJO NAN PANJANG		Lah jangko hati den rusak Lah patuik iman den taguah Dek sabai nan rancak Mambuek hati den bapaliang Kini baitu hanyo lai Indak kok takuik diri tuan Bini nan rancak ka jadi rando Anak nan indak ka bapak lai Den ulang sakali lai sarahkan sabai pado denai Pado buruak nan tasuo
RAJO BABANDIANG		Rundiangan tuan kok di danga Bijak bakato jo baradaik Bantuak urang baradek bana Tapi bapihak ka nan salah
RAJO NAN PANJANG		Sampan batutuik daun tarok Ka di baok ulak batu rampak Lah den cubo ba elok elok Kecek den indak waang danga Mano lah waang rajo babandiang Ukualah bayang bayang badan Den bakandak waang bapaliang Rasok dek ang batantangan
RAJO BABANDIANG		Sungguah bagadiang babulalai Kana lah samuik di baliwo Sungguah tinggi pucuak manjulai Lamo lambek ka patah juo
RAJO NAN PANJANG		Pucuak dicinto ulam tibo Sumue di kali aie datang Den urak langkah di siko Den sigi silek jo bayang
RAJO BABANDIANG		Adaik di dunia cubo mancubo Usah barundiang kito pabanyak Maaf disiko kok tak ado Langkah nan samo kito bukak
INYO MULAI BASILEK JO RAJO NAN PANJANG RAJO BABANDIANG MATI DEK RAJO NAN PANJANG
SABAI NAN ALUIH		Ayah …………. Ayah …………. Ayah …………. (Maratok) Aie manyuruak kato sabai Bakelok juo janyo ayah Mimpi buruak kato sabai nan elok juo kato ayah Ayah ……. Ayah ……. Manga ayah tinggakan denai yah Ayah kanduang di badan sabai Pusek jalo tumpunan ikan Ayah ……….. Gadang salero rajo nan panjang Tipih karih ujuang ba taji Den ndak takuik nyao malayang Nyao ayah den bayia kini Den sasok darah rajo nan panjang

RAJO NAN PANJANG DI CARI DEK SABAI NAN ALUIH

UNTUK MENUNTUT BALAS ATAS KEMATIAN AYAHNYA

RAJO NAN PANJANG		Oi sabai nan elok rupo jarek mato palarai damam disiko adiak malah kironyo
SABAI NAN ALUIH		Tuan rajo nan panjang malah kironyo Lah panek denai manunggu Tuan nan indak kunjuang tibo Kiniko baru kito batamu Den sangko tuan bahati jo bajantuang Kironyo manuhuak kawan sairiang
RAJO NAN PANJANG		Sabai nan aluih janyo denai Danga dek adiak denai katokan Ayam kuriak rambaian taduang ikue manjelo masuak padi Ambiak tampuruang bari makan Dalam daerah limo kaum Adiak surang nan tapatan hati Nan lain buliah denai haramkan Kok dapek karambia puyuah diak den tanam di pamatang babuah labek pado patai kok dapek kasiah nan sungguah diak den gungguang den baok tabang satapak haram kabacarai
SABAI NAN ALUIH		Ondeh tuan rajo nan panjang Kalau baitu kato tuan Iyo pulo bak papatah urang Usah disabik padi salibu Kok di sabik luko lah kaki Denai maliek dalam saribu hanyo Tuan tampak hati tapi  samantangpun baitu Tuan nan pandai bamanih muluik Pandai manggunting dalam lipatan Urang di hadang di tangah jalan Sampai tabunuah ayah denai
RAJO NAN PANJANG		Ondeh adiak sabai nan aluih Usah dilalai diabaian Kandak di hati kalau di tahan Namuah marompak mambunuah badan Kok mati bana ayah adiak den kan lai kagantinyo Kok dapek kito basandiang diak Bara kasanang kiro kiro Maklum lah sabai tantang itu
SABAI NAN ALUIH		Kalau baitu kato tuan  indaknyo sanang dalam hati Indaknyo sajuak di kiro kiro Adaik di dunia baleh mambaleh Utang ameh baia jo ameh Utang nyawo baie jo nyawo
RAJO NAN PANJANG		Adiak denai sabai nan aluih Usah mangecek tadorong dorong Urang didunie banyak kiramaik Agak kato kalau mangecek diak Awak nan ketek mudo matah
SABAI NAN ALUIH		Samantang denai parampuan nan dikatokan urang batulang lamah den Tak takuik nyao malayang sabalum tatuntuk baleh ayah
RAJO NAN PANJANG		Sabana kareh hati kau Sadang kan ayah kau urang nan sati Lai mati tasingguang dek tangan den Konon pulo dek kau Aaaaaaaaaaaaah………… Susah den mangatokannyo Kau kajadi bini den bagai
SABAI NAN ALUIH		Oi tuan rajo nan panjang Dek denai kajadi garah dek tuan jadi iyo bana disinan sangketo mangko tajadi
RAJO NAN PANJANG		Adiak denai sabai nan aluih Mandanga kato nan bak kian Sanang rasonyo dalam hati Sajuak dalam pamikiran Kini baitu molah dek adiak Molah kito karumah baa pandapek hati adiak
SABAI NAN ALUIH		Kalau baitu kato tuan Dahulu malah tuan salangkah …. Denai manuruik dari balakang
SABAI MENIKAM RAJO NAN PANJANG DARI BELAKANG TAPI GAGAL RAJO NAN PANJANG MENGETAHUI GERAK GERIK SABAI NAN ALUIHG
		Eeeeeeeee Bahayo bana kau sabai Kau cido den Lah habih sayang banci mairiang Indak lalu dandang di aia Di gurun den tanjakan Rasoan dek kau makan tangan den ….. (Rajo nan panjang bacakak jo sabai nan alui akhirnya sabai berhasil menikam rajo nan panjang sehingga rajo nan panjang mati ditusuk pisau pusaka dari ayahnya)
SABAI NAN ALUIH		Lah mati rajo nan panjang Mati tabunuah di tangan sabai Panjang umua manyusah urang Banyak nak gadih nan kamarasai

3.   SIMARANTANG TINGGI

Iyo ….

Jikok kaparak sanak isuak

Ambiak lah pucuak si katu katu

Hari nan sadang sanjo rayo

Jikok tacinto sanak isuak

Caliak lah kami ka smk 1

Disinan tampek sasarannyo

Dunsanak oiiiii