NASKAH CERITA RANDAI MINANG SITI BAHERAN - DIKETIK OLEH ERICK YONANDA

SILAHKAN SUBSCRIBE JIKA INFO INI BERMANFAAT 

ABAIKAN JIKA TIDAK

RANDAI

CERITA SITI BAHERAN

Oleh:

ERIK YONANDA

KESENIAN TRADISIONAL MINANGKABAU

“SANGGAR MUDO BARAPI”

KOTA SOLOK

1.   DAYANG DAINI

Cupak tajajak ta jalani

Jo sambah sajo kami atok

Ujuang jo pangka tak babenso

Kok tak tapijak tanah tapi

Oi nan marantang kok salah kakok

Arang tak habih basi binaso

2.   SIMARANTANG RANDAH

Cubo lah timbang dek nan pandai

Oi timbang nagari jan binaso 2x

Timbang nagari jan binaso

Kami bamain tari randai

Manganduang pasan jo curito 2x

Manganduang pasan jo curito

SEKAPUR SIRIH

Assalamualaikum pamulo pambukak kato

Jo bismillah kato dimulai

Bagai awa pamulai kato

Sipatan rundiang pandahuluan

Salam taunjuak sanak sudaro

Iyo kaganti bajawek tangan

Sairiang balam jo barabah

Barabah lalu balam mandi

Sairiang salam nan jo sambah

Sambah lalu salam kumbali

Ketek nan indak disabuikkan namo

Gadang nan indak diimbaukan gala

Marapek katangah medan nanko

Rila jo maaf kami mintak

Kabakeh niniak nan jo mamak

Alim ulama cadiak pandai

Ipa bisan bako jo baki

Andai tolan sanak sudaro

Sarato ado manyumando

Sarato sanak kasadonyo

Ganti Kaparintang rintang hati

Kapalapeh kaua salamoko

Kami tatiangkan curito randai

SITI BAHERAN

Tipak kapado caritoko sanak

Kok kurang asin dek garamnyo

Kurang padeh dek ladonyo

Racik bawangnyo kok kurang aluih

Tolong dek sanak samparonokan

Bukan nyo sarok sarok balai sajo mak

Sarok kok ado silaronyo

Sapukan taruih ka hilaman

Bukannyo ratok randai sajo mak

Kok ado kagunonyo jadikan telong Kapidoman

Anak rang padang manggumpa banang

Banang digumpa lalu dilipek

Dilipek lalu dipatigo

Kok dirantang namuahnyo panjang

Elok dipunta naknyo singkek

Ambiak sajo nan paguno

Kabau gadang pandai lago

Makan barulak kaparaku

Adaik nak pulang kapusako

Sambah baulak kanan tahu

Sakian sambah dari ambo

ADEGAN 1

Mande		Nak kanduang sibujang joki Anak surang tongga babeleang siupiak sinan Sibuyuang sinan rusuah bana mande mandanga apo dek anak nan taraso apo dihati nan takilah
Bujang joki		Manolah mande kanduang ambo Rusuah bana hati didalam Pado wakatu iko kini Hati taniaik nak ka galanggang Alek nagari …….. Rusuah kok lai ka batenggang Kamande pitih ka buyuang mintak
Mande		Nak kanduang sibujang coki Lai tak salah mande mandanga kamano pitih kamande cari apo barang nan kamande jua Oi buyuang ubah lah laku Jikok maunyi koto  jo nagari Turuik haluan nan bak urang Tau malambeh manaruko bataranak kabau jo baitiak itiak jo ayam di pabanyak Tapi dek waang tak baitu balain bana dari urang tiok hari pai bajudi lah habih hari dek basionjak rancak dek ameh urang basalang licin dek minyak urang bamintak badan sapantun alang alang kok tak angin badan talatak paham ang sapinteh lalu lah rumik mande manyabuik sarupo bana jo anjalu santun limau mangkonyo hiduik
Bujang Joki		Manolah mandeh kanduang ambo Apo iko nan mande sabuik Nan indak indak mande katokan Mande maetong pulau tingga Mambilang pasia di pantai
Mande		Nak kanduang si bujang joki Iduik didunia ko tak kalamo Rago mananti dagangan tibo kok mati kito dek takadia nak aja ulah dek bilangan sampai tasirah tanah panggalian mandeh disabuik urang juo kasiah ka buyuang baru sampai apa jalan dek batampuah sako urang tigo lurah sarugo dek iman taguah narako dek laku awak bapikia buyuang tantang itu
Bujang Joki		Oi mande kanduang ambo Jan diulang duo kali Maramang kuduak den mandangakan Kok tak ado pitih ka mande bari Den pandai mancari surang Ka den tumpang kapa tak batengkek Ka den unyi rumah tak badapua Badan maunyi pulai tingga Denai nan indak kamanyasa lai Tingga lah mandeh ditangah rumah Den bajalan hanyo lai
Mande		Nak kanduang sibujang joki Usah dorong lompatan Muluik tadorong ka binaso Kok ditompang dayo setan nak Sansaro badan kasudahannyo
Bujang Joki		Kanso lah sudah den kansokan Pantang balimau puruik Kato lah sudah den katokan Pantang di den babaliak suruik
Mande		Nak dangalah kato mande nak ….. (menangis ) Indak den sangko sirigo rigo Pipik sinanduang makan padi Indak den sangko ka co iko Pisau disaruang malukoi

DENDANG                                 

Alah marantak lah kanduang oi sibujang coki

Taruih bagageh nan kanduang oi oi turun janjang

Taruih bagageh nan kanduang oi oi turun janjang

Mande ma nangih nan kanduang oi baibo hati

Lah putuih asonan kanduang oi  jo anak kanduang

Taruih bagageh nan kanduang oi oi turun janjang

ADEGAN 2

Bujang joki		Manolah uniang siti baheran Dari mano handak kamano Sia bana nan uniang cari Tangah malam bajalan surang
Siti Baheran		Mano lah ajo janyo ambo Bari luruih ambo batanyo Bari asa barundiang Apo sabab karanonyo maambek urang dinan langang
Bujang joki		Oi uniang siti baheran Lah lamo pandan tak diladuangkan Kini baru den lambaikan Lah lamo dandam den taruahkan Kini baru den sampaikan Oi uniang siti baheran Sarahkan ameh kasadonyo Kok lai ibo nyao jo badan Usah uniang banyak curito
Bujang kambuik		Ajo joki janyo hambo Sasa dahulu pandapatan Sasa kudian tak baguno Jan ditompang biduak setan Sansaro badan kasudahannyo Kok lah habih tenggang jo kalaka di runduik nan sahabih padam kok tak dapek untuang kadikaja tak sarato untuang jo bagian
Ajo Joki		Mano lah waang buyuang kambuik Jan ang halang kappa laju Den barajo di hati den Den basutan dimato den Kandak den pantang indak balaku Pinto den pantang indak kabuliah Tumbuah sarupo iko kini kawan manjadi lawan kalau maambek pintu rasaki jo waang waang den bunuah
Siti baheran		Ajo joki janyo ambo Ambiak dek ajo sagalo barang Asa badan ndk taniayo Rila ambo mambarikan Kandak di hati ajo turuikan Salah jo bana tak baguno Gadang lah doso batangguangkan Halal jo haram kok tabenso
Bujang joki		Manolah kalian kaduonyo Bialah mati badan tagantuang Asa lai dapek kandak dihati Rilakan ambo kabasambuang Den bunuah kau kini
Bacakak dengan silek jo siti baheran, Ketika Siti baheran akan membunuh sjoki di larang oleh ajo kambuik Ketika itu joki menggunakan kesempatan untuk membunuh siti baheran
MANCARI SITI BAHERAN OLEH JAGO GADANG …. TERNYATA DIA BERTEMU SITI BAHERAN SUDAH TERKAPAR DIBUNUH OLEH JoKI …. LALU DIPANGILKAN KEPADA WARGA
Ibu siti baheran		Nak kanduang siti baheran Ulah dek laku parangai urang Sansaro anak manangguangkan Simantuang dibukik putuih Jarajak ditanah taban Ndak dapek manjulai lai Tampek bagantuang nan alah putuih Tampek bapijak nan alah taban Kamano mande ka manggapai lai Oi awan nan bararak turunkan ambun agak satitiak Pambasuak luko siti baheran Malang dek mande nan punyo anak Balayia sampan tak ba cadiak Kadihampeh riak jo galombang
Angku palo		Diak kanduang mandeh siti baheran Usahlah tangih adiak taruihkan Tak dapek disasali Suratan sudah dahulunyo Mano dek kito kasadonyo Kubuakan mayik siti baheran Kakok karajo surang surang Sabab ba dek bak itu Fardu kifayah kito dek nan tingga Mayik tabujua kok tak bakubua Badoso kito kasadonyo

ADEGAN 3

Bujang joki		Mano lah waang sibuyuang kambuik Bajalan buyuang kapasa Untuak manjua ameh jo perak Untuak kapokok kito bajudi
Bujang kambuik		Mano lah ajo janyo ambo Kok baitu kato ajo Nak sugiro Ambo bajalan Untuak manjua ameh jo perak
KETIKA AKAN PERGI KE PASAR TERNYATA DIHADANG OLEH DUBALANG ANGKU PALO MENCARI PEMBUNUH SITI BAHERAN
Dubalang Angku palo		Manolah waang sibujang joki Urang nan bagak digalanggang Sajak tadi kami mancaliak Mudo bana paruntuangan
Bujang joki		Manolah dubalang angku kapalo Urang bijak jo juaro Tibo pulo dubalang disiko Sia bana nan dubalang cari
Dubalang angku palo		Manolah waang sibujang joki Indak kok waang ka mandang Siti baheran mati tabunuah Harato diambiak kasadonyo ameh dirampok tak basiso manuruik kaba nan den dapek kini waang bapitih banyak ringgik ameh iyo pulo pihak kami nan baduo titian aia balawan asok disuruah dek angku palo mancari sia nan marampok antah kok kalian nan baduo
		Mano dubalang angku kapalo Kato dubalang dorong lompatan Disangko ijuak tak basaga disangko lurah tak babatu kato nan lalu lalang sajo apo bukti sia saksi kalau kami nan babuek
		Manolah waang sibujang joki Takuik karano salah barani karano bana  indak kok kalian nan babuek ameh sia nan kalian jua
Bujang joki		Oi dubalang angku palo Iko sarupo dubalang nanko  Ukua lah bayang bayang tubuah Nak jan mandapek malu gadang Den barapo dilawuik ko Kalau surang jo baduo Kalau ampek jo balimo Sapuluah duo puluah tangguang maindang jo marupo
Dubalang angku palo		Kalau baitu kato waang bukak lah langkah dari sinan Nak den iriang dari siko (Bacakak silek sibujang joki dan bujang kambuik)
Angku kapalo		Mano kalian nan baduo Asuang dubilih nan kalian turuik
Bujang joki		Ampun kan kami angku kapalo Pihak dek kami nan baduo Kasawah kaladang sagan Hiduik mahampok main judi Itulah sabab karanonyo Katajadi bantuak iko Kini baitulah dek angku Hukum lah kami kok nan salah
Mande joki		Nak kanduang sibujang joki indak ang pacik  pitaruah mande buto mato babintang tarang patah sayok batungkek paruah indak bak siang jo bak malam manggadangkan diri waang guno jo iko waang baleh
		Manolah mande janyo ambo Sajak salaruik salamo nanko Indak bapacik pitaruah mande Kini badan den juo manangguangkan Ampun kan denai mande kanduang
		Mano dek kito kasadonyo Buek hinggo iko kaateh Apo karajo nan ka dikakok Kaji dulu mularaik nyo Baru manfaek nyo Mano dubalang kaduonyo Baok sijoki pulang Manuruik adaik nan biaso Tangan mancancang bahu mamikua Hukum putuih manuruik salahnyo
SEKIAN

SILAHKAN SUBSCRIBE JIKA INFO INI BERMANFAAT 

ABAIKAN JIKA TIDAK

3.      SIMARANTANG TINNGI

Ampun …..

Baribu kali ampun

Ampun sabaleh jo kapalo

Jari sapuluah nan kami susun

Rila jo maaf kami pinto

Kapado sanak kasadonyo mak oiiii