PANTUN MINANG NOF SIKUMBANG

SILAHKAN SUBSCRIBE JIKA INFO INI BERMANFAAT 

ABAIKAN JIKA TIDAK

PANTUN MINANG

NOF SIKUMBANG

Di elo dek cinto hati...

Di dorong dek kandak bana..

Dek sayang kakampuang jo nagari..

Mako dijago seni jo budaya..

Ramo ramo tabang malayang...

Malayang dari koto tangah..

Banyaknyo ampek puluah ampek..

Dek cinto ka ranah minang...

Jan sampai seni budayo punah..

Mako adaik jo budayo dipacik arek..

Lakek pituah dinan tuo..

Dek tahun baganti musim batuka..

Jaman nan alah baraliah..

Dek baiak budi bahaso..

Tadorong dimuluik manih..

Limbago tigo sapilin...

Dikaji siriah langkok:

Partamo siriah jo pinang..

Kaduo baso jo basi..

Katigo jo undang undang..

Talatak siriah jo pinang..

Latak didalam carano basa..

Pananti alek nan tibo..

Baitu adaik sopan santun..

Alah talatak ditangah tangah..

Buruang sinurak buruang nuri..

Batalua ateh pimantang..

Siriah galak pinang manari..

Maliek alek nan alah datang..

Carano ameh kasatian..

Tuangan guguak koto gadang..

Buatan urang sungai pua..

Galeh nak urang banuhampu..

Songkokknyo bak tiuang katabang..

Kungkunnyo gagak bak kahinggok..

Karakah bungo kacubuang..

Kacanggai bungo kalikih..

Baukia bamego mego..

Balilik jo pucuak rabuang..

Batutuik jo dalamak makkah..

Pananti alek nan datang..

Barisi siriah didalamnyo..

Siriah nan kuniang kuniang gagang..

Ditanam didalam kabun..

Bakisa kasuduik laman..

Bajunjuang jo aua kuniang..

Ka alek condong gagangnyo..

Tiok badaun tiok digatia..

Bapucuak salai satahun..

Tiok balai ditampuahnyo..

Manjua sakali tido..

Talatak dalam carano..

Manjadi kapalo baso..

Pihak kapado dek pinangnyo...

Pinang lolak pinang lolan..

Pinang nan dari runggo guo..

Tinggi manyapu nyapu awan..

Satahun tupai mamanjek..

Haram basuo jo buahnyo...

Babulan salodang jatuah..

Jatuhlah pinang ciek ciek..

Disambuik puti dayang sudah..

Jatuahlah buah katapak tangan..

Dipupua masuak carano..

Manjadi kapalo baso..

Pihak kapado dek gambianyo...

Gambia dadiah ulu salewang..

Tampang dari tareh surambi..

Buatan puti sari lamak..

Sapipia jatuah kasiriah..

Manyirah sampai kabibia..

Mambayang sampai kamuko..

Talatak dalam carano..

Manjadi kapalo baso..

Pihak kapado dek sadahnyo...

Kulik pensi asa mulonyo..

Ditapi danau mambueknyo..

Dibasuah jo aia ambun..

Dirandam jo pati santan..

Dugiliang jo tapak tangan...

Dipalik jo jari manih..

Bakisa  kajari tunjuak..

Membayang katapak tangan..

Diraso jo ujuang lidah..

Kaleknyo tingga dilidah..

Talatak dalam carano.. 

Manjadi kapalo baso..

Pihak kapado timbakaunyo..

Timbakaunyo sirani ameh..

Disaik sireno alam..

Saheto panjang jelonyo..

Indaknyo masiak dek paneh..

Masiak diambun tangah malam..

Talatak dalam carano..

Manjadi kapalo baso..