CERITA RANDAI LAREH SIMAWANG

NASKAH

SANGGAR MUDO BARAPI KOTA SOLOK

CARITO RANDAI LAREH SIMAWANG

 

Oleh:

SANGGAR ATEH LUBUAK

KESENIAN TRADISIONAL MINANGKABAU

“SANGGAR MUDO BARAPI”

Kota Solok

assalmualaikum pamulo pambukak kato

jo bismillah kato dimulai

salam jo sambah disampaikan

bagai awa pamulai kato

sipatan rundiang pandahuluan

salam taujuak sanak sudaro

iyo kaganti bajawek tangan

dari awa sampai akhie

gawa jo kilaf sifek kito

nak jan binaso papan dek ukie

bari maaf  badan ambo

mangkok nyo kami kamarambah

nak nyo tarang jalan kamuaro

mangkoknyo kami ka manyambah

kito basalo tuo jo mudo

kami nak randai ateh lubuak

nan talatak di saok laweh

dalam daerah kabupaten solok

banda urang kami bandakan

banda nak lalu kamuaro

kaba urang kami kabakan

jikok salah tolong lah sapo

nan takaba lareh simawang

duo jo diri siti jamilah

sitidarama anak nan gadang

asam sudin anak nan ketek

dalam daerah batu sangka

bak ibarek urang sanak

atai atai sibungo atai

lah kambang bungo sitawa

walaupun tacacah jangguik ka lantai

namun manusia basifek gawa

maklumlah kami anak randai

umua nan balun satahun jaguang

darah nan balum satampuak pinang

aka balun pangalaman kurang

gadang badan gadang dek lueh

tolong dek sanak samparonokan

buliah nak samo ka nan elok

randai bamulai hanyo lai

NAMA TOKOH	CERITA
Asamsudin      :	Lamo Bana Ayah Kapakan Lah Putuih Hanang Dek Turak Lamo Bana Ayah Bajalan Lah Hanguih Jantuang Dek Taragak.
Lareh Simawang	Mako Ayah  Lambek Di Ladang Anjalai bana Banyak Nan Rabah Mako Ayah Talambek Pulang Bangkalai Banyak  Nan Tak Sudah Nak Kanduang Siti  Darama, Asam Sudin, Anak Kan Lah Samo Tahu Ayahko Larek Di Nagari, Manjadi Lareh Di Simawang, Adaik Urang Manjadi  Lareh, Siang Di Seso Dek Karajo, Malam Di Seso Angan-Angan, Ayah Nan Baru Pulang  Kumisi Entan Ka Ranah Batu Sangka.
Siti Darama          :	Taganang Aia Di Jajaran, Bandakan Lalu Ka Muaro Tagamang Kami Ayah Tinggakan, Kami Biaso Di Aja Manjo.
Asam Sudin        :	Parik Malelo Garan Kolah, Aia Taganang Dalam Padi Sakik Kapalo Garan Ayah, Barubah Rupo Di Pandangi.
Siti Jamilah         :	Tuan Kanduang Lareh Simawang, Junjuang Nyawo Badan Diri Tumpangan Hiduik Lahia Batin, Hari Nan Galok, Galok Paneh, Jamua Di Halaman Nan Takaka, Gabak Dihulu Tando Kahujan, Hati Nan Harok- Arok Cameh, Buruang Pamenan Dalam Sangkak, Bak Raso Bapindah Tangan.
Lareh Simawang :	Diak Kanduang Siti Jamilah, Ubek Jamilah Palarai Daman, Sidingin Tampak Di Kapalo, Usah Rusuah Kayu Disingka, Kok Singka  Den  Pitaduahkan , Dibawah Batang Langgundi, Usah Rusuah Adiak Kok  Tinnga, Kok Tingga Den Pitaruahkan Ka Urang Nagari. *Siti Riwayah  Masuk Di Sonsong Oleh Siti Darama Dan Asam Sudin, Dengan Penuh Gembira Dan Senang Hati.
Siti Rawiyah        :	Lah Lamo Badan Den Dak Kamari, Taragak Pulo Den Jo Anak Den, Lah Tigo Hari Dek Kapatang, Darah Didado Bagumirok, Baraso Lai Nan Tak Sanang, Maliek Kalian Kini, Sanang Rasonyo Hati Mandeh, Lah Gadih  Siti Darama, Asam Sudin Lah Bujang Pulo, Lai Sanang Malah Kalian.
Siti Darama          :	Mandeh Kanduang Badan Dek Diri, Pihak Kadiri  Badan Kami, Lai Sanang-Sanang Sajo, Ayah...... Juo Nan Barubah.       Dahulu  Padi  Balendokan       Kinilah Talang Tapi Rimbo       Dahulu Kami Bamanjokan       Kinilah Sayang  Baparinggo
Asam Sudin        :	Sialang Bukik Bajojo, Dihilia Ranah Palambayan . Dilua Sanang Kiro-Kiro, Didalam Mabuak  Paratian.
Siti Rawiyah        :	Lah Cadiak Anak Den Kini, Lah Tahu Dirantiang  Kamanyangkuik, Lah Tahu Dibatang  Ka Mahinpok, Sanang Bana Hati Mandeh, Kamalah  Jatuah Aia Tuturan, Kok Indak Ka Palimbahan, Jikok  Bakonyo  Urang Cadiak, Sampai Ka Anaknyo Cadiak Juo...............
Siti Jamilah         :	Kakak Den Siti Riwayah, Lah Lamo Tak Kamari, Kakak Taragak  Kami Tacinto, Babincang-Bincanglah Kakak  Dahulu, Denai Nak Pai Kabalakang. *Siti Jamilah, Siti Darama, Asam Sudin Pergi Kebelakang, Tinggalkan Siti Rawiyah Dengan Lareh Simawang.
Lareh Simawang:	Kakak Denai Siti Rawiyah, Untuang Bana Kakak Datang, Kok Indak Denai Kadatang  Juo, Pai Manjalang Kakak  Kanduang. Urang  Baralek Tangah Sawah Mambao Niru Jo Tapian Inek  Di Kakak Jariang Sawah Bak Nantun Kusuik Paratian.
Siti Riwayah        :	Adiak Den Lareh Simawang, Kito  Baduo Badunsanak, Apo Bana Nan Tarumik, Susah Nak Kito Bagi Duo, Tolong Tarantangkan Jaleh-Jaleh.
Lareh Simawang:	Aia  Lah Bulek Kapambuluah, Katolah Sudah Kamupakaik, Lah Dapek Kato Nan Saiyo, Iyo Jo Urang Batusangka, Sapatah  Kini Denai Kawin, Jo Urang Gadih Siti Rohani, Cucu Pasa Nan Pansiun, Alekko Alek Sabalah, Di  Batusangka  Sajo  Urang Baralek, Nan Hanguih Denai Manangguangkan, Tolong Dek Kakak  Jo Bicaro, Siti Jamilah Alun Lai Tahu, Kakak  Juo Nan Kamanyampaikan.
Siti Rawiyah        :	Den Tak Suko.... Den Tak Suko .... Den Tak Suko Diak Kanduang , Talingo Den Tak Suko Mandangakan, Mato Den  Tak  Suko Kamaliek, Kito  Manjadi  Buah  Gunjiangan  Urang Diak, Habih Dagang Baganti Dagang.... Kanalah  Maso Nan Dahulunyo, Samaso  Adiak  Tukang  Kabun, Tukang  Kabun  Tuangku Manduo, Etan Diranah  Padang Panjang. Dek  Tunggang  Jalan Manurun Baok   Balereang  Tampek Lalu Samantang  Adiak  Badaun Rimbun Kanalah  Rengek Nan Dahulu.
Lareh Simawang:	Itu Nan Usah Kakak Sabuik, Lai  Den  Kana  Guno  Tanah, Takana Guno Siti  Jmilah, Samaso Denai Tukang  Kabun, Jamilah Jadi Tukang Masak, Disinan  Kasiah  Bamulai, Siti Jamilah Nan Mahaja, Mako Den Tahu Tuliah Baco, Sampai Den  Jadi  Juru Tuliah, Takalo  Tabukak  Jabatan  Lareh, Siti Jamilah  Nan  Mausuangkan Kapado  Tuangku  Mandua, Mako Den Lareh Di Simawang.
Siti Rawiyah        :	Kok Adiak  Lai  Mangana, Lai Takana Guno Tanah, Takana Jaso Siti Jamilah  ambeklah  Adiak  Babini  Surang Lai....!
Lareh Simawang:	Kakak Nan Indak Marasokan , Malu Den Tangguang   Kini, Hilia Mudiak Urang Bagunjiang, Satinggi  Nangkolah Pangkaik Sajombang  Nangkolah  Badan , Awak  Gagah Babini Dagang, Bak Cando Urang  Indak  Laku, Nan Sakarang Kini Nangko, Malu  Bak  Raso Katalampok, Denai Dapek Bini Gadih, Jo Nan Gombang Siti Rohani.
Siti Rawiyah        :	Bia Bak Mano Alasan Adiak, Denai  Tak Suko Tu Diak  Kanduang, Adiak Babini Surang Lai, Indak Di Den Manyampaikan, Kapado Siti  Jamilah, Manuruik Paham  Hati Denai, Dalam Hiduak  Barumah Tanggo, Asa Lai  Sasakik  Jo Sasanang, Ka Bukik Samo Mandaki, Kalurah  Samo  Manurun, Surang Jadi Adiak Babini...!
Lareh Simawang:	Den Jo Padi Den, Indak Sia  Nan  Ka Manyiang, Den Jo Hati Den Indak Sia Nan Kamalarang.!
Siti  Rawiyah       :	Adiak Den Lareh Simawang Barisuak Hari Kasalasa, Urang Bakadai  Pagi Hari Hisuak  Adiak  Ka Manyasa, Indak Dimuluik Dalam Hati. *Dalam  Batangka  Masuk Siti  Jamilah Dan Kedua Anaknya.
Siti  Rawiyah       :	Adiak Den Siti Jamilah, Sakik  Kapalo Den Tibo-Tibo, Denai Nak Pulang  Lah  Dahulu, Sabuah  Pasan  Pado  Adiak Kok Tumbuah  Tali Bapilin, Usah Adiak Rantang Surang Baduo Kito Mahelokannyo Kok Tumbuah  Tangihah  Dalam Batin, Usah Adiak Tangguangkan Surang, Ratok Nan Kito Bagi Duo. *Siti Rawiyah Pergi Dan  Diantarkan Oleh Siti Darama,Asam Sudin,Tinggal  Lareh  Simawang  Jo  Siti  Jamilah.
Lareh Simawang:	Diak Kanduang  Siti Jamilah, Ubek Jariah Palarai Daman, Tumpahan  Kasiah Badan Diri, Danga Den Adiak  Elok-Elok, Pihak Di Badan Diri Adiak,  Salaruik Salamo Nangko, Lawik Dalam Rimbonyo  Hana, Padangnyo  Laweh   Pikiran  Lapang, Nan Sakarang Kini Nangko, Hadok  Kabadan  Diri Denai, Kaki Tataruang Inai Padamnyo, Tataruang Kaki  Dibatusangka, Tabuek Karang  Jo Buatan, Balam Timbago Tigo  Gayo, Balam Pamenan Urang  Simawang, Kini Balam Basangkak Duo, Sabuah Sangkak  Disimawang, Sabuah Sangkak  Di Batu Sangka, Bak Mano Timbangan  Adiak.
Siti Jamilah         :	Tuan Kanduang Lareh Simawang, Junjuangan Nyawo Badan  Diri, Pihak Kami Rang Padusi, Indak  Sakik-Sakik Nangko, Indak Padiah Bana Nangko, Pamenan  Diambiak  Urang, Tapi Baalah Mangatokan, Bak Umpamo Mamacik Padang, Laki-Laki Tapacik Dihulu, Padusi  Tapaciak Dimato, Dihelo Tangan Nan Luko.
Lareh Simawang:	Diak  Kanduang  Siti  Jamilah, Sungguh Denai  Di Batusangka, Hati Denai Tingga Di Simawang, Jamilah   Indak  Den Lupokan Karani Mati Di Duri,Bakubua Dikampuang  Cino Jamilah  Talukiah Dalam Hati,Antah  Kabilo Kaluponyo.
Siti Jamilah         :	Tuan Kanduang  Lareh  Simawang, Tuan  Kini  Urang Bapangkaik, Tuan Urang Bakuaso, Tuan Tasabuik  Urang Mulia, Lah Patuik Dunia Tuan Kacak, Tapi.....Sabuah  Pintak Pinto Denai, Mananti Tuan Satahun Lai, Manantikan Anak Basikolah, Sidarama  Alun Lai Gadang, Siasan Sudin Alum  Baraka.
Lareh Simawang :	Bak  Tagalak  Kamatian, Kini Gata Isuak Digawik, Lah Cadiak  Bana Kini Kau  Kini  Hai... Jamilah...! Iko Lareh  Simawang, Aden Basutan Dimato  Den, Aden Barajo  Dihati  Den, Kandak  Den Pantang  Indak  Balaku, Pinto  Den  Pantang  Indak  Kabulieh, Sadang Di Kakak Kanduang Den, Indak  Tahambek  Tabulintang, Konon   Di  Kau Anak  Dagang................. Usah Den Di Patah-Patah,Tapatah Pucuak  Jilantang Usah  Den Ditagah –Tagah,Itu Pantang Lareh Simawang.
Siti  Jamilah        :	Tuan  Den  Lareh  Simawang, Indak  Patuik Tuan  Baitu, Mangatokan   Denai Dagang Sansai, Rang Dagang Paibo  Hati....... Den Tahu Dipadi  Den,Padi Den Padi Anjalai. Dentahu Jo Diri Den,Diri Den Dagang  Sansai.
Lareh Simawang:	Kalau Kau Tahu Jo Diri Kau, Tahu Diri Urang Dagang, Indak Basuko Jo Basako, Indak  Bakampuang  Jo  Halaman, Aden Nan  Usah  Ditagah-Tagah, Kalau Indak  Kasuko Kau, Kahilia Labuah Tarantang, Kamudiak  Indak  Bapaga, Tinggakan Nagari Lareh  Simawang, Babaliak Kau Ka Asa Kau....! *Lareh Simawang Marentak Lalu Maimbau Urang Jago Gadang.   Manalo Lah Urang  Jago Gadang, Capek Sugiro Lah Kamari, Langkok  Kan Kudo Nan Putiah, Kanakan Palano Kamalereng, Denai  Barangkai Kini Juo.
Siti Darama           :	Ayah Kanduang  Lambek  Kapakan, Kaladang  Padi  Rang  Dahulu, Ayah Kanduang  Jan Bajalan, Nantikan Gadang Kami Dahulu. *Lareh  Simawang  Marentak  Lalu Berangkat Dengan Marah, Dan Siti Darama Dan Asam Sudin Mengejar Ayahnya, Dan Memegang Tepi  Baju Ayahnya. Lareh Simawang  Menolak  Anaknya, Hingga Siti Drama  Dan Asam Sudin Terjatuh, Dan Lareh Simawang Tetap Berangkat. *Siti Jamilah  Menangis Lalu Mengangkat Kedua Anaknya  Dan  Membawanya Kedalam Rumah.
	Rumah  Gadang  Batingkok   Tidak Oi Mamak Oi      Kamalah  Angin  Nan Ka Lalu      Antah Kok  Lai Diliang-Liang  Lantai      Hati Nan Rusuah Tasingkok  Tidak      Sialan Urang Nan Ka Tahu      Antah  Kok  Samo  Nan Marasai Gadang Aia Nan Dibanda Baru,Tarandam  Kadai  Urang Cino, Banyak Manangguang Karugian. Kasiah Tuan Denai Lah Tahu,Bak Cando Urang Mangganggam Baro,Taraso Angek Balapehkan
	**Dirumah Siti Rohani Di Batusangkar. Kesibukan  Dirumah  Mempelai Wanita, (Anak Daro) Dalam Menunggu  Marapulai  Dengan Mengirianginya (Menunngu Lareh  Simawang) Di Sambut Dengan Upacara Penyambutan, Anak Daro Jo Marapulai, Lah  Duduak  Kaduonyo, Dan Diteruskan  Dengan Upacara Sambah Manyambah.
Sutan Mudo              (SiPangkalan)       :	Tuanku Lareh Simawang....! Sambah Dipanaik  Pado  Tuanku, Minta Maaf  Barundiang  Saratah  Duo  Patah, Jo Alek  Nan Datang  Jamu Nan Tibo. Sutan  Butuah  Di Ujuang .....! Sungguah Pun Sutan Surang  Nan  Disambah, Sarapeh  Papek  Sagalo  Alek  Nan Datang  Jamu  Nan Tibo, Tampek Ambo Maantakan Sambah  Mambaokan Salam, Ado Pun Sambah Disambahkan, Kok Nan Dinanti  Alah  Tibo, Kok Nan Ditunggu  Alah  Datang Nan Dipinto Alah Buliah,Marapulai Alah  Duduak  Jo Anak  Daro,Sananglah Mato Mamandangi, Pihak Dikami  Sipangkalan, Kapado Alek Nan Datang, Mahadoakan Siriah Nan  Katangah, Siriah  Sacabiek  Mintak Dikunyah, Pinang Sagatok   Mintak Dimakan, Dek Alek Nan Datang, Jamu Nan Tibo, Kok Iyo Lai Di Janjang Tampek Naik, Lai Ditanggo  Bakeh  Turun, Kandak Mintak Dipalakukan, Pintak Mintak Dibuliahkan, Dek Alek Nan  Datang Jamu Nan Tibo, Kasudahan  Sambah Pado Anggku.
Sutan  Butan          :	(Alek). Tuanku Lareh Simawang...! Sambah Di Panaik Pado  Tuanku, Mintak Maaf  Kami  Barundiang  Jo Si  Pangkalan, Sutan Mudo  Dipangka. Diateh  Sambah-Manyambah, Pasambahan Angku Juo Nan  Dianjuang Tinggi Diambak   Gadang, Pihak Dikami Alek  Nan  Datang, Indak  Ditiok   Dari Alif, Indak Dibilang Dari Aso, Satantangan Pasambahan Angku  Tadi, Diambiak Sado Nan  Paguno, Sapanjang  Bunyi Didanga, Siriah Sacabiak Mintak Dikunyah, Pinang Sagatok Mintak Dimakan, Dek Alek Nan Datang Jamu Nan Tibo, Iyo Baitu  Bunyi  Pasambahan Anggku....! Kato  Bajawab Gayuang Basambuik, Apo Ka Jawabnyo  Dari  Kami, Siriah Sacabiak Lah Bakunyah, Pinang Bagatok Lah Bamakan, Pintak Puliah Kandak Alah balaku, sambah Dibaliakan  Pado Sutan.
Sutan Mudo           :	Angku Sutan Batuah Di Ujuang. Karano Siriah Alah Bakunyah, Pinang Alah Bamakan, Pihak Dikami Si Pangkalan, Ado Nan Taraso Dihati, Takilan Dimato,Taraso Dihati Nak Mangatokan,Taraso Dimato Nak Mancaliakan,Bakandak  Bakeh Nan  Kabuliah, Mamintak Ka Alek Nan Datang, Rancak-Rancak Salendang Dunia, Rancak Dimato Nak Maliek, Rancak Dihati Nak Mamakai, Kami Nak Mamintakan  Salendang  Adaik, Parmainan Anak Mudo-Mudo, Kandak Mintak Dipalakukan, Mintak-Mintak Dibuliahkan, Dek Alek Nan Datang Jamu Nan Tibo, Kasudahan Sambah Pado Angku.
Sutan Batuah         :	Jikok Itu Kandak Angku, Pihak Dikami Alek Nan Datang. Kambanglah  Jalo di  Serakan, Kanailah Anak Tali-Tali, Barang Nan Ado Diadokan, Kok Indak Samo Kito Cari.
Sutan Mudo           :	Pintak  Buliah  Kandak  Balaku  Sananglah  Hati Sipangkalan, Kito Sudahi Pasambahan. (Dalam Alek  Ditampilkan  Tari-Tarian, Pencak  Silat,Dll).
Sutan Batuah         :	Angku Sutan Mudo Dipangka. Pihak Kami Alek Nan Datang, Lah Kalua Main Anak Mudo-Mudo, Kini Bakandak Pulo Kami Sipunyo Alek, Kapado Urang Sipangkalan, Kaciak Baganti, Gadang Balega, Nak Mintak Kami Main Nan Tuo-Tuo.
Sutan  Mudo          :	Kok Nan Bakandak Kami Bari, Kok Nan  Mambali Kami Pajuai, Kini Nan Kamain Nan Tuo-Tuo, Agieh Yo Tuan Gaek........! *Bermain Pencak  Silat,Sewa,Tari Kain,Lukah Gilo,Dll. (Penampilan   Tari  Dari  Pihak  Tuan  Rumah)
Sutan Mudo           :	Angku  Sutan Batuah Di Ujuang! Lah  Sayuik  Mato Dek Mamandang, Lah  Basah  Talingo  Dek  Mandanga, Mainan  Anak Mudo-Mudo Bacampua Jo Mainan Tuo-Tuo, Sananglah  Raso Dalam Hati, Sajuak  Didalam Kiro-Kiro, Nan Sakarang Iko Kini, Elok Lenggang Di Nan Data,Rancak Di Arak Marapulai Jo Anak  Daro, Katiko  Paneh  Balun  Garang, Samantaro Hari Baik Kini, Kito Arak  Sakaliliang  Batusangka, Ba’a Lai Cocok Tu.....
Sutan  Batuah        :	Anak  Kabau Mangoek, Anak  Jawi Manyusu, Diangku  Lai  Taragak, Dikami  Lai Katuju. Molah  Kito  Barangkek  Hanyo  Lai, Gua Sakali Talempok Tu Pak Sudin. *Maarak  Marapulai  Jo  Anak  Daro  Yang Diiringi Dengan Bunyi-Buyian Talempong, Gandang, Pupuik Gandang, Dengan  Gembira.
	Babaju   Satin  Jo  Biludu, Bajaik Jo Banang  Suto Putuih  Suto Jo Kulindan, Disiko Mangko Hati Ragu, Kabau Dibari Bapalano Kudo  Dibari  Bapasangan. Babaliak Kaba Kasimulo, Karumah  Siti Jamilah, Sadang  Tamanuang  Garan Kani, Takana  Untuang Parasaian.
	Dirumah  Siti Jamilah Di Simawang.
Siti Jamilah           :	Manolah Urang  Jago  Gadang, Capek Sugirolah Kamari, Ado Rundiangan  Ka  Denai  Sampaikan (Urang Jago Gadang Datang).
Urang Jago Gadang:	AaaamPun Ka Denai Aciak  Kanduang......!
Siti Jamilah            :	Manolah Urang Jago Gadang, Baoklah Sabik  Jo  Rajuik, Carikan Rumpuik  Kudo Putiah, Dilurah Satungkua Banang, Di Sinan  Banto Mudo-Mudo, Disinan Rumpuik Ganti-Gatilan, Kasinan Rang Jago Pai..!
Rang Jago Gadang :	Aciak  Den  Siti Jamilah, Manga  Sajauh  Tu  Bana  Denai  Pai, Denai Takuik  Bajalan  Surang.
Siti Jamilah            :	Kato Den Kadidanga, Bicaro Den  Kadituruti, Capek  Sugiro  Lah Barangkek.....! Kok  Datang Urang Batanyo, Ado Kadiri Badan Kami, Nan Kaibo Usah Dikatokan, Rang Dagang   Baibo   Hati....! *Urang  Jago  Gadang  Barangkek, Siti  Jamilah  Mengunci Pintu, Dan Mengambil Rencong  Aceh, Karieh  Pusako  Lareh Simawang.
	Pado  Manunggu Si Rigo-Rigo, Elok Kapulau  Bilang-Bilang. Pado Manangguang Nan Bak  Nangko, Suko Rilla  Badan             Kok Hilang. Pado Rumpuik  Eloklah Padi, Nak  Murah  Basiang  Ladang. Pado Hiduik Eloklah  Mati, Jaannyo Hiduik  Manyeso  Urang.
Siti Jamilah           :	Mano Nak  Kanduang Kaduonyo, Kok Ino Dimanuangkan, Pihak Dikato Ayah  Anak, Itulah Kato  Nan  Sabananyo, Kito  Dagang  Tak Babanso, Indak Basuku Jo Basako, Kununlah  Urang Kakuliang.
Siti  Darama            :	Kampuang Jambak  Dibaliak  Rimbo, Dabaliak  Kampuang Banda Hilalang, Sanang  Dunsanak Lai Tak Tibo, Kunun Lah Urang Kakuliang.
Asam  Sudin          :	Tatumbuak  Biduak Di Belokkan, Tatumpuk Aka  Dipikiran, Kok Sampiak  Alam Tambek  Tagak, Baok  Bakisa  Kanan  Lapang, Ba’a  Pikiran  Mandeh  Tantang Itu.
Siti  Jamilah           :	Nak  Kanduang  Siti Darama, Kaduo Asam Sudin, Lah  Tibo Garak  Dalam  Tubuah, Dihari  Sahari Kini, Bacarai Nyawo Jo  Badan, Ikolah Pisau Rencong Aceh, Pisau Pusako Ayah, Anak Jo Iko Nyawo Disudahi......! Mati  Surang Mati Baduo, Mati katigo Payudahi, Nak Sanang Bana Hati  Ayah  Anak, Nak Dikacak  Bana Dunia Nangko, Usah  Kito Nan Pahalang......!
Asam Sudin           :	Mangalah Mande   Sarupo   Iko, Didayo  Setan Jo  Ubilih, Suruiklah  Mandeh Kana  Bana, Pihak  Kapado Diri Denai, Alum Den Mati nan Bak  Kini, Denai Baniek  Gadang Bana, Kok Siang Basikolah, Malam Pai Mangaji, Denai Nak Manjadi Lareh Pulo, Sarupo Jo Ayah Kanduang.
Siti   Darama          :	Adiak Den Si Asam Sudin, Usah Dilawan Kato Mande, Itulah Kato Sabananyo, Kok Sampai Kito Gadang, Malu Tak Mungkin Kito Apuih, Malu Tumbuah Malu Nan Jaleh, Luko Kito Luko Dikaniang, Tak Mungkin Disaok Lai, Kito Urang Dagang Sansai diak, Indak Elok Urang Manjadi Lareh, Indak Elok Urang Bapangkaik, Urang Bapakaik Lupo Diri, Mande Kanduang Badan Diri, Bunuh Dimande Badan  Denai, Pisau Nan Usah Mande Usokkan, Kok Taraso Padiah Di Den Bak Iko, Tikamkan Sajo Kuek-Kuek,nak Jan Lamo Den Manangguangkan.
Siti Jamilah            :	Nak Kanduang Siti Darama, Maso Ketek  Anak  Den Gadangkan, Rangiak  Saiku Mande Halau, Alun  Gadanglah  Mande Bunuah, Piciankan Mato Anak Kanduang, Usah Tampak  Pisau Malayang .......! *Siti Jamilah Manikan  Siti Darama,Darah Hiduik Bacucuran,Siti Darama  Mengeliat Kesakitan Dan Meninggal Dengan  Pisau,Siti Jamilah Menghampiri Asam Sudin.
Asam Sudin           :	Mande ….. Alah  Gilo  Mande Den......! Kakak  Den Lah Dibunuhnyo .....!  Oooi ... Rang  Kampuang ......Tolong.....Tolong....Tolanglah Badan Denai ... Denai Alun nio Mati Bak Kini,.......!
Siti Jamilah            :	Kalangiak Pai Mamakiak ......! Kasia Ang  ka Mangadu, Ayah Ang Jadi Marapulai, Sadang Basandiang Inyo Kini, Sarahkan ...... Sajo Diri   Anak.
Asam Sudin           :	Indak...Indak....Indak......Mande..............!
Siti Jamilah            :	Mati Surang ....Mati Baduo... Mati Batigo Manyudahii. *Kejar-Kajaran Terjadi Dan  Akhirnya  Asam Sudin  Dapat  Ditangkap Oleh Siti Jamilah,Dan Terus Membunuhnya,Terakhir Siti Jamilah  Membunuh Dirinya  Sendiri. Seterusanya Urang  Jago  Gadang  Masuk  Pulang Dari Mancari Rumpuik Kudo, Dan Terkejut Melihat Mayat  Terbujur Diatas Rumah, Urang Jago Gadang Balari Manjapuik Siti Rawiyah, Dan Angku Kapalo. Siti Rawiyah, Angku Kapalo  Dan Urang Jago Gadang Masuk.
Angku Kapalo        :	Manolah Urang Jago Gadang, Tarangkan Asa Mulonyo, Mangko Tajadi Nan Bak Iko.
Urang Jago Gadang:	Am...Am...Ampunkan  Denai  Angku Kapalo, Den Tak Namuah Den Tak Namuah, Aden Dituduah Mambunuah Aciak Jo Adiak-Adiak Den.... Asa Mulonyo Den Tak Tahu, Darah Taserak Den Tamui.
Siti Rawiyah           :	Manolah Angku Kapalo, Usah Ditanyo Urang Jago Gadang, Tak Jaleh Dek Inyo Asa Mulonyo, Nan Sakarang Kini Nangko, Suruah Urang Jago Gadang Manjapuik Lareh Simawang, Etan Diranah Batusangka, Ka Rumah Siti Rohani, Inyo Sadang Basandiang Kini, Japuik Pulo Simarah Sudin Etan Karanah Padang Panjang, Anak Tiri Lareh Simawang, Inyo Nan Sadang Sikolah Guru.
Angku Kapalo        :	Manolah Urang Jago Gadang Barangkaik  Kini Juo, Gua Sakali Tabuah Larangan, Nak Tahu Urang Dalam  Nagari, Apo-Apo Garangan   Nan Tajadi. *Urang Jago Gadang Barangkek, Kedengaran Bunyi  Tabuah Dan  Orang Kampung Berdatangan. Lareh Simawang Masuk  Dan Menirap Kepada Mayat Anaknya.
Siti  Rawiyah          :	Sanang  Bana Hati Adiak,Papueh Bana Manghadang Dunia, Gangam Paciak Dunia Nangko Diak ....! Adiak Urang Bapangkeik, Adiak  Urang Bakuaso Di Batusangka, Adiak  Basandiang, Di Simawang Darah Taserak........!
Lareh Simawang    :	Sia...? Aden Nan Salah....? Indak...! Indak...! Jamilah... Kau Nan Cilako....! (Nada Suara Lunak) Indak....! Kau Elok Jamilah....! Kau Nan Bana....! Aden Nan salah......! (Suara Nada Keras) Batigo  Kalian Mati ,.....! Barampek Jo Den......! *Pisau Diambil Diatas Perut Siti Jamilah  Dan Langsung Membunuh Diri Sendiri,Pisau Keatas  Ditangkap Oleh Angku Kapalo Dan Menunduk Lareh Simawang.
Angku Kapalo        :	Lah Salah Angku Mamasangkan, Adaik Dimano Angku Pakai, Limbago Dimano Angku Tuangkan, Manuruik   Adaik Didalamko, Banamo Adaik Minang Kabau, Namun Banamo Cucu Adam, Kok Tagaknyo Samo Tinggi, Kok Duduaknyo Samo Randah, Indak Ado Beda Jo Bedonyo, Urang Asa Jo Urang Datang, Nan Jadi Pokok Pangka, Dimano  Bumi  Dipijak   Disinan   Langik  Dijunjuang, Dima’a   Tabilang Tahantak  Disinan Tanaman Tumbuah, Adaik Samo Dipakai, Limbago Samo Dituangkan, Tapi Kok  Jalan  Diasak Urang  Lalu, Cupak Dialiah Urang  Panggaleh. *Lareh Simawang Gila Menangis Dan Tertawa.
Siti  Rawiyah :	Dek Harok Basubang Gadang Talingo Rumpuang Tak Dikana Dek Haro Manghanang Dunia Hutang Tumbuah Saliliak  Pinggang.
Angku kapalo	Lah masak padi di ladang Dijamua mangko di kaka Lah malang lareh simawang Anak mati aka batuka