LAREH SIMAWANG TANPA SUTAN BATUAH

NASKAH

SANGGAR MUDO BARAPI KOTA SOLOK

CARITO RANDAI LAREH SIMAWANG

 

Oleh:

Sanggar Mudo Barapi Kota Solok

KESENIAN TRADISIONAL MINANGKABAU

“SANGGAR MUDO BARAPI”

Kota Solok

Sekapur Sirih

Cupak panuah gantang balajuang

Jatuah ka alam tigo luhak

Pusako di minang kabau

Jo salam sambah kami anjuang

Rila jo maaf kami mintak

Ukua jo jangko kok talampau

Mamintak rila nanjo maaf  Kapado niniak nan jo mamak, Alim ulama cadiak pandai, Anak baranak, ipa, bisan, bako jo baki, Andai tolan sanak sudaro, sarato ado jo manyumando jo, sanak kasadonyo,

Ketek nan indak disabuikkan namo, Gadang nan indak baimbau gala

Rapek ditangah medan nanko

Saedaran singgalang jo marapi

salingka singkarak jo maninjau

Lareh duo luhak nan tigo

dalam daulat Minangkabau

Dilingkuang sambah kasadonyo

Pihak ka badan diri kami

kami sapantun anak ayam, pagi pagi kandang tabukak lalu mahambua ka halaman, mangakeh hilia jo mudiak, kok lai takakeh dinan ado barabuik jo induak samo mancotok, Maklumlah mamak tantang itu

Kapalapeh niaek dalam hati pambayia kaua salamoko

gati parintang rintang hati, untuk apaulang kaji lamo

pambangkik budayo alam Minangkabau

kami tatiangkan curito lamo Lareh Simawang

Tipak kapado carito ko sanak

tantu ado salah jo kilafnyo sumbang jo jangganyo

kok tak dilahie lakek atok kok

tak dibarih makan pahek

indak diukua nan kami kabuang

rila jo maaf kami mintak

Ibarek urang mamasak, kok ndak padeh di ladonyo, kok ndak asin dek garamnyo, racik bawangnyo kok kurang aluih tolong dek sanak samparonokan

Kabau nan gadang pandai lago makan barulak ka paraku

adaik nak pulang ka pusako sambah baulak ka nan tahu

sakian sambah dari kami

SEKAPUR SIRIH

assalmualaikum pamulo pambukak kato

jo bismillah kato dimulai

salam jo sambah disampaikan

bagai awa pamulai kato

sipatan rundiang pandahuluan

salam taujuak sanak sudaro

iyo kaganti bajawek tangan

dari awa sampai akhie

gawa jo kilaf sifek kito

nak jan binaso papan dek ukie

bari maaf  badan ambo

mangkok nyo kami kamarambah

nak nyo tarang jalan kamuaro

mangkoknyo kami ka manyambah

kito basalo tuo jo mudo

kami nak randai ateh lubuak

nan talatak di saok laweh

dalam daerah kabupaten solok

banda urang kami bandakan

banda nak lalu kamuaro

kaba urang kami kabakan

jikok salah tolong lah sapo

nan takaba lareh simawang

duo jo diri siti jamilah

sitidarama anak nan gadang

asam sudin anak nan ketek

dalam daerah batu sangka

bak ibarek urang sanak

atai atai sibungo atai

lah kambang bungo sitawa

walaupun tacacah jangguik ka lantai

namun manusia basifek gawa

maklumlah kami anak randai

umua nan balun satahun jaguang

darah nan balum satampuak pinang

aka balun pangalaman kurang

gadang badan gadang dek lueh

tolong dek sanak samparonokan

buliah nak samo ka nan elok

randai bamulai hanyo lai

ADEGAN PERTAMA Lareh Simawang, Asam Sudin, Siti Darama, Siti Jamilah, Siti Rawiyah
Siti darama	Ramo ramo tabang batali Hinggok dibatang bungo rayo Lah putiah mato dek mananti Ayah nan indak kunjuang tibo
Asam Sudin      :	Lamo Bana Ayah Kapakan Lah Putuih banang Dek Turak Lamo Bana Ayah Bajalan Lah Hanguih Jantuang Dek Taragak.
Lareh Simawang	Mako Ayah  Lambek Di Ladang Anjalai bana Banyak Nan Rabah Mako Ayah Talambek Pulang Bangkalai Banyak  Nan Tak Sudah Nak Kanduang Siti  Darama kaduo Si Asam Sudin, Anak Kan Lah Samo Tahu Ayahko Lareh Di Nagari, Manjadi Lareh Di Simawang, Adaik Urang Manjadi  Lareh, Siang Di Seso Dek Karajo, Malam Di Seso Angan-Angan, Ayah Nan Baru Pulang  Kumisi Entan Ka Ranah Batu Sangka maklumlah anak tantang itu.
Siti Darama          :	Taganang Aia Di Jajaran, Bandakan Lalu Ka Muaro Tagamang Kami Ayah Tinggakan, Kami Biaso Di Aja Manjo.
Asam Sudin        :	Parik Malalo Garan Kolah, Aia Taganang Dalam Padi Sakik Kapalo Garan Ayah, Barubah Rupo Di Pandangi.
Siti Jamilah         :	Tuan Kanduang Lareh Simawang, Junjuang Nyawo Badan Diri Tumpangan Hiduik Lahia Batin, Hari Nan Galok, Galok Paneh, Jamua takaka Di Halaman Gabak Dihulu Tando Kahujan, Hati Nan Harok- Arok Cameh, Buruang Pamenan Dalam Sangkak, Bak Raso Bapindah Tangan.
Lareh Simawang :	Diak Kanduang Siti Jamilah, Ubek Jamilah Palarai Daman, Sidingin Tahampa Di Kapalo, Usah Rusuah Kayu Disingka, Kok Singka  Den  Pitaduahkan , Dibawah Batang Langgundi, Usahlah Rusuah Adiak Kok  Tinnga, Kok Tingga Den Pitaruahkan Ka Urang Nagari. Siti Riwayah  Masuk Di Sonsong Oleh Siti Darama Dan Asam Sudin, Dengan Penuh Gembira Dan Senang Hati.
Siti Rawiyah        :	Assalamualaikum Lah Lamo Badan Den Dak Kamari, Taragak Pulo Den Jo Anak Den, Lah Tigo Hari Dek Kapatang, Darah Didado Bagumirok, Baraso Lai Nan Tak Sanang, Maliek Kalian Kini, Sanang Rasonyo Hati Mandeh, Lah Gadih  Siti Darama, Asam Sudin Lah Bujang Pulo, Lai Sanang Malah Kalian.
Siti Darama          :	Mandeh Kanduang Badan Dek Diri, Pihak Kadiri  Badan Kami, Lai Sanang-Sanang Sajo, Ayah...... Juo Nan Barubah.       Dahulu  Padi  Balendokan       Kinilah Talang Tapi Rimbo       Dahulu Kami Bamanjokan       Kinilah Sayang  Baparinggo
Asam Sudin        :	Sialang Bukik Bajojo, Dihilia Ranah Palambayan . Dilua Sanang Kiro-Kiro, Didalam Mabuak  Paratian.
Siti Rawiyah        :	Lah Cadiak Anak Den Kini, Lah Tahu Dirantiang  Kamanyangkuik, Lah Tahu Dibatang  Ka Mahimpok, Sanang Bana Hati Mandeh, Kamalah  Jatuah Aia Tuturan, Kok Indak Ka Palimbahan, Jikok  Bakonyo  Urang Cadiak, Sampai Ka Anaknyo Cadiak Juo...............
Siti Jamilah         :	Kakak Den Siti Riwayah, Lah Lamo Tak Kamari, Kakak Taragak  Kami Tacinto, Babincang-Bincanglah Kakak  Dahulu, Denai Nak Pai Kabalakang, sabalum hari tinggi bana, sabalum paneh alum lai garang denai bajalan hanyo lai. Siti Jamilah, Siti Darama, Asam Sudin Pergi Kebelakang, Tinggalkan Siti Rawiyah Dengan Lareh Simawang.
ADEGAN KE DUA Siti Rawiyah jo Lareh Simawang
Lareh Simawang:	Kakak Denai Siti Rawiyah, Untuang Bana Kakak Datang, Kok Indak Denai Kadatang  Juo, Pai Manjalang Kakak  Kanduang. Urang  Baralek Tangah Sawah Mambao Niru Jo Tapian Inek  Di Kakak Jariang Sawah Bak Nantun Kusuik Paratian.
Siti Riwayah        :	Adiak Den Lareh Simawang, Kito  Baduo Badunsanak, Apo Bana Nan Tarumik, Susah Nak Kito Bagi Duo, Tolong Tarantangkan Jaleh-Jaleh.
Lareh Simawang:	Aia  Lah Bulek Kapambuluah, Katolah Sudah Kamupakaik, Lah Dapek Kato Nan Saiyo, Iyo Jo Urang Batusangka, Sapatah  Kini Denai Kawin, Jo Urang Gadih Siti Rohani, Cucu Pasa Nan Pansiun, Alekko Alek Sabalah, Di  Batusangka  Sajo  Urang Baralek, Nan Hanguih Denai Manangguangkan, Tolong Dek Kakak  Jo Bicaro, Siti Jamilah Alun Lai Tahu, Kakak  Juo Nan Kamanyampaikan.
Siti Rawiyah        :	Den Tak Suko.... Den Tak Suko .... Den Tak Suko Diak Kanduang , Talingo Den Tak Suko Mandangakan, Mato Den  Tak  Suko Kamaliek, Kito  Manjadi  Buah  Gunjiangan  Urang Diak, Habih Dagang Baganti Dagang.... Kanalah  Maso Nan Dahulunyo, Samaso  Adiak  Tukang  Kabun, Tukang  Kabun  Tuangku Manduo, Etan Diranah  Padang Panjang. Dek  Tunggang  Jalan Manurun Baok   Balereang  Tampek Lalu Samantang  Adiak  Badaun Rimbun Kanalah  Rengek Nan Dahulu.
Lareh Simawang:	Itu Nan Usah Kakak Sabuik, Lai  Den  Kana  Guno  Tanah, Takana Guno Siti  Jmilah, Samaso Denai Tukang  Kabun, Jamilah Jadi Tukang Masak, Disinan  Kasiah  Bamulai, Siti Jamilah Nan Mahaja, Mako Den Tahu Tuliah Baco, Sampai Den  Jadi  Juru Tuliah, Takalo  Tabukak  Jabatan  Lareh, Siti Jamilah  Nan  Mausuangkan Kapado  Tuangku  Mandua, Mangkok Den Lareh Di Simawang.
Siti Rawiyah        :	Kok Adiak  Lai  Mangana, Lai Takana Guno Tanah, Takana Jaso Siti Jamilah  ambeklah  Adiak  Babini  Surang Lai....!
Lareh Simawang:	Kakak Nan Indak Marasokan , Malu nan Denai Tangguang   Kini, Hilia Mudiak Urang Bagunjiang, Satinggi  Nangkolah Pangkaik, Sajombang  Nangkolah  Badan , Awak  Gagah Babini Dagang, Bak Cando Urang  Indak  Laku, Nan Sakarang Kini Nangko, Malu  Bak  Raso Katalampok, Denai Dapek Bini Gadih, Jo Nan Gombang Siti Rohani.
Siti Rawiyah        :	Bia Bak Mano Alasan Adiak, Denai  Tak Suko Tu Diak  Kanduang, Adiak Babini Surang Lai, Indak Di Den Manyampaikan, Kapado Siti  Jamilah, Manuruik Paham  Hati Denai, Dalam Hiduak  Barumah Tanggo, Asa Lai  Sasakik  Jo Sasanang, Ka Bukik Samo Mandaki, Kalurah  Samo  Manurun, Surang Jadi Adiak Babini...!
Lareh Simawang:	Den Jo Padi Den, Indak Sia  Nan  Ka Manyiang, Den Jo Hati Den Indak Sia Nan Kamalarang.!
Siti  Rawiyah       :	Adiak Den Lareh Simawang Barisuak Hari Kasalasa, Urang Bakadai  Pagi Hari isuak  Adiak  Ka Manyasa, Indak Dimuluik Dalam Hati. Dalam  Batangka  siti rawiyah memanggil Siti  Jamilah Dan Kedua Anaknya.
Siti  Rawiyah       :	Adiak Den Siti Jamilah, Sakik  Kapalo Den Tibo-Tibo, Denai Nak Pulang  Lah  Dahulu, Sabuah  Pasan  Pado  Adiak Kok Tumbuah  Tali Bapilin, Usah Adiak Rantang Surang Baduo Kito Mahelokannyo Kok Tumbuah  Tangih  Dalam Batin, Usah Adiak Tangguangkan Surang, Ratok Nan Kito Bagi Duo. Siti Rawiyah Pergi Dan  Diantarkan Oleh Siti Darama, Asam Sudin, Tinggal  Lareh  Simawang  Jo  Siti  Jamilah.
ADEGAN KE TIGA Siti Jamilah dan Lareh Simawang
Lareh Simawang:	Diak Kanduang  Siti Jamilah, Tumpahan  Kasiah Badan Diri, Danga Den Adiak  Elok-Elok, Pihak Di Badan Diri Adiak,  Salaruik Salamo Nangko, Lawik Dalam Rimbonyo  Hana, Padangnyo  Laweh   Pikiran  Lapang, Nan Sakarang Kini Nangko, Hadok  Kabadan  Diri Denai, Kaki Tataruang Inai Padamnyo, Tataruang Kaki  Dibatusangka, Tabuek Karang  Jo Buatan, Balam Timbago Tigo  Gayo, Balam Pamenan Urang  Simawang, Kini Balam Basangkak Duo, Sabuah Sangkak  Disimawang, Sabuah Sangkak  Di Batu Sangka, Bak Mano Timbangan  Adiak.
Siti Jamilah         :	Tuan Kanduang Lareh Simawang, Junjuangan Nyawo Badan  Diri, Pihak Kami Rang Padusi, Indak  Sakik-SaSakik Nangko, Indak Padiah sapadiah Nangko, BakPamenan  Diambiak  Urang, Tapi Baalah Mangatokan, Bak Umpamo Mamacik Padang, Laki-Laki Tapacik Dihulunyo, Padusi  Tapaciak Dimatonyo, Dihelo Tangan Nan Luko.
Lareh Simawang:	Diak  Kanduang  Siti  Jamilah, Sungguh Denai  Di Batusangka, Hati Denai Tingga Di Simawang, Jamilah   Indak  ka Den Lupokan Karani Mati Di Duri, Bakubua Dikampuang  Cino Jamilah  Talukiah Dalam Hati, Antah  Kabilo Kaluponyo.
Siti Jamilah         :	Tuan Kanduang  Lareh  Simawang, Tuan  Kini  Urang Bapangkaik, Tuan Urang Bakuaso, Tuan Tasabuik  Urang Mulia, Lah Patuik Dunia Tuan Kacak, Tapi.....Sabuah  Pintak Pinto Denai, Mananti Tuan Satahun Lai, Manantikan Anak Basikolah, Sidarama  Alun Lai Gadang, Siasam Sudin Alum  Baraka.
Lareh Simawang :	Bak  Tagalak  Kamatian, Kini Gata Isuak Digawik, Lah Cadiak  Bana  Kau  Kini  Hai... Jamilah...! Iko Lareh  Simawang, Aden Basutan Dimato  Den, Aden Barajo  Dihati  Den, Kandak  Den Pantang  Indak  Balaku, Pinto  Den  Pantang  Indak  Kabulieh, Sadang Di Kakak Kanduang Den, Indak  Tahambek  Tabulintang, Konon Di Kau Anak  rang Dagang................. Usah Den Di Patah-Patah, Tapatah Pucuak  Jilantang Usah  Den Ditagah –Tagah, Itu Pantang Lareh Simawang.
Siti  Jamilah        :	Tuan  Den  Lareh  Simawang, Indak  Patuik Tuan  Baitu, Mangatokan   Denai Dagang Sansai, Rang Dagang Paibo  Hati....... Denai Tahu Dipadi  Denai,Padi Denai Padi Anjalai. Denai tahu Jo Diri Denai,Diri Denai Dagang  Sansai.
Lareh Simawang:	Kalau Kau Tahu Jo Diri Kau, Tahu Diri Urang Dagang, Indak Basuko Jo Basako, Indak  Bakampuang  Jo  Halaman, Aden Nan  Usah  Ditagah-Tagah, Kalau Indak  Kasuko Kau, Kahilia Labuah Tarantang, Kamudiak  Indak  Bapaga, Tinggakan Nagari Lareh  Simawang, Babaliak Kau Ka Asa Kau....! Lareh Simawang Marentak Lalu Maimbau Urang Jago Gadang
Lareh Simawang	Manalo Lah Urang  Jago Gadang, Capek Sugiro Lah Kamari
Rang jago gadang	Ampun kan denai tuan kanduang
Lareh Simawang	Langkok  Kan Kudo Nan Putiah, Kanakan Palano Kamalereng, Denai  Barangkai Kini Juo (Lareh Simawang Barangkek Dihadang Oleh Ananya)
Siti Darama           :	Ayah Kanduang  Lambek  Kapakan, Kaladang  Padi  Rang  Dahulu, Ayah Kanduang  Jan Bajalan, Nantikan Gadang Kami Dahulu. Lareh  Simawang  Marentak  Lalu Berangkat Dengan Marah, Dan Siti Darama Dan Asam Sudin Mengejar Ayahnya, Dan Memegang Tepi  Baju Ayahnya. Lareh Simawang  Menolak  Anaknya, Hingga Siti Drama  Dan Asam Sudin Terjatuh, Dan Lareh Simawang Tetap Berangkat. Siti Jamilah  Menangis Lalu Mengangkat Kedua Anaknya  Dan  Membawanya Kedalam Rumah
Siti Jamilah           :	Manolah Urang  Jago  Gadang, Capek Sugirolah Kamari, Ado Rundiangan  Ka  Denai  Sampaikan (Urang Jago Gadang Datang).
Urang Jago Gadang:	AaaamPun Kan Denai Aciak  Kanduang......!
Siti Jamilah            :	Manolah Urang Jago Gadang, Baoklah Sabik  Jo  Rajuik, Carikan Rumpuik  Kudo Putiah, Dilurah Satungkua Banang, Di Sinan  Banto Mudo-Mudo, Disinan Rumpuik Ganti-Gatilan, Kasinan Rang Jago Pai..!
Rang Jago Gadang :	Aciak  Den  Siti Jamilah, Manga  Sajauh  Tu  Bana  Denai  Pai, Denai Takuik  Bajalan  Surang.
Siti Jamilah            :	Kato Den Kadidanga, Bicaro Den  Kadituruti, Capek  Sugiro  Lah Barangkek.....! Manolah urang jago gadang ,,,,, Kok  Datang Urang Batanyo,Hadok Kadiri Badan Kami, Nan Kaibo Usah disabuik, Rang Dagang   Baibo   Hati....! Urang  Jago  Gadang  Barangkek, Siti  Jamilah  Mengunci Pintu, Dan Mengambil Rencong  Aceh, Karieh  Pusako  Lareh Simawang.
ADEGAN KE EMPAT Lareh simawang baralek gadang dengan siti rohani Alek dimeriahkan oleh acara kesenian tradisi minang kabau salah satunya penampilan silek den nan mudo setelah itu baru di arak sekeliling kampong
ADEGAN KE LIMA Siti Jamilah Membunuh Anaknya
Siti Jamilah           :		Mano Nak  Kanduang Kaduonyo, Kok Ino Dimanuangkan, Pihak Dikato Ayah  Anak, Itulah Kato  Nan  Sabananyo, Kito  Dagang  Tak Babanso, Indak Basuku Jo Basako, Kununlah  Urang Kakuliang.
Siti  Darama            :		Kampuang Jambak  Dibaliak  Rimbo, Dabaliak  Kampuang Banda Hilalang, Sadang  Dunsanak Lai Tak Tibo, Kunun Lah Urang sakuliliang
Asam  Sudin          :		Tatumbuak  Biduak Di Belokkan, Tatumbuk Aka  Dipungkiri, Kok Sampik  Alam Tambek  Tagak, Baok  Bakisa  Kanan  Lapang, Ba’a  Pikiran  Mandeh  Tantang Itu.
Siti  Jamilah           :		Nak  Kanduang  Siti Darama, Kaduo Asam Sudin, Lah  Tibo Garak  Dalam  Tubuah, Dihari  Sahari Kini, Bacarai Nyawo Jo  Badan, Ikolah Pisau Rencong Aceh, Pisau Pusako Ayah, Anak Jo Iko Nyawo Disudahi......! Mati  Surang Mati Baduo, Mati katigo Payudahi, Nak Sanang Bana Hati  Ayah  Anak, Nak Dikacak  Bana Dunia Nangko, Usah  Kito jadi Panghalang......!
Asam Sudin           :		Mangalah Mande   Sarupo   Iko, Didayo  Setan Jo  dubilih, Suruiklah  Mandeh Kana  Bana, Pihak  Kapado Diri Denai, Alum nak Mati nan Bak  Kini, Denai Baniek  Gadang Bana, Kok Siang Basikola, Malam Pai Mangaji, Denai Nak Manjadi Lareh Pulo, Sarupo Jo Ayah Kanduang.
Siti   Darama          :		Adiak Den Si Asam Sudin, Usah Dilawan Kato Mande, Itulah Kato Sabananyo, Kok Sampai Kito Gadang, Malu Tak Mungkin Kito Apuih, Malu Tumbuah Malu Nan Jaleh, Luko Kito Luko Dikaniang, Tak Mungkin Disaok Lai, Kito Urang Dagang Sansai diak, Indak Elok Urang Manjadi Lareh, Indak Elok Urang Bapangkaik, Urang Bapakaik Lupo Diri, Mande Kanduang Badan Diri, Bunuh Dimande Badan  Denai, Pisau Nan Usah Mande Usokkan, Kok Taraso Padiah didiri denai, Tikamkan Sajo Kuek-Kuek, nak Jan Lamo Den Manangguangkan.
Siti Jamilah            :		Nak Kanduang Siti Darama, Maso Ketek  Anak  Den Gadangkan, Rangik  Saiku Mande Halau, Alun  Gadanglah  Mande Bunuah, Piciankan Mato Anak Kanduang, Usah Tampak  Pisau Malayang .......! Siti Jamilah Manikan  Siti Darama,Darah Hiduik Bacucuran,Siti Darama  Mengeliat Kesakitan Dan Meninggal Dengan  Pisau, Siti Jamilah Menghampiri Asam Sudin.
Asam Sudin           :		Mande …. Mande ….. Alah  Gilo  Mande Den......! Kakak  Den Lah Dibunuhnyo .....!  Oooi ... Rang  Kampuang ......Tolong.....Tolong....Tolanglah Badan Denai ... Denai Alum nio Mati Bak Kini .......! Ampun mande ….. Ampun mande …..
Siti Jamilah            :		Kalangiak Pai Mamakiak ......! Kasia Ang  ka Mangadu, Ayah Ang Jadi Marapulai, Sadang Basandiang Inyo Kini, Sarahkan ...... Sajo Diri   Anak.
Asam Sudin           :		Indak...mande …..Indak.... mande ……Indak......Mande..............! Asam Sudi Mati Ditusuk Pisau Oleh Siti Jamilah
Siti Jamilah            :		Anak mandi denai manyauak Buliah nak samo basah basah Anak mati denai maramuak Buliah nak samo bakalang tanah Mati Surang ....Mati Baduo... Mati Batigo Manyudahii. Terakhir Siti Jamilah  Membunuh Dirinya  Sendiri. Seterusanya Urang  Jago  Gadang  Masuk  Pulang Dari Mancari Rumpuik Kudo, Dan Terkejut Melihat Mayat  Terbujur Diatas Rumah, Urang Jago Gadang Balari Manjapuik Siti Rawiyah, Dan Angku Kapalo. Siti Rawiyah, Angku Kapalo  Dan Urang Jago Gadang Masuk
Angku Kapalo        :		Manolah Urang Jago Gadang, Tarangkan Asa Mulonyo, Mangko Tajadi Nan Bak Iko.
Urang Jago Gadang:		Am...Am...Ampunkan  Denai  Angku Kapalo, Den Tak Namuah Den Tak Namuah, Aden Dituduah Mambunuah Aciak Jo Adiak-Adiak Den.... Asa Mulonyo Den Tak Tahu, Darah Taserak Den Tamui.
Siti Rawiyah           :		Usah Ditanyo Urang Jago Gadang, Tak Jaleh Dek Inyo Asa Mulonyo, Nan diwakatu kini Nangko, Suruah Urang Jago Gadang Manjapuik Lareh Simawang etan ka ranah Batusangka nan sadang basandiang inyo kini
Angku Kapalo        :		Manolah Urang Jago Gadang Barangkaik  Kini Juo, ang japuik lareh simawang, Gua Sakali Tabuah Larangan, Nak Tahu Urang Dalam  Nagari, Apo Garangan   Nan Tajadi.
Urang Jago Gadang Barangkek, Kedengaran Bunyi  Tabuah Dan  Orang Kampung Berdatangan
Jago Gadang         :		Tuan …. Tuan …… Tuan…  (lareh simawang manyuruah pulang rang jago gadang)
Simawang		Pulang (malu dengan kedatangan jago gadang)
		Tuan kanduang lareh simawang, kiniko juo tuan pulang Ampun kan denai tuan kanduang Bukan denai malawan tuan (manangih) Aciak tuan (manangih) Aciak ndak ado lai tuan ….. Siti darama baitu pulo …. Asam sudin ….. (manangih)
Siwawang		(Panik tak tahu lagi apa yang akan dilakukan, lalu barundiang jo siti rohani) Diak kanduang siti rohani Rumik denai ka manyabuik Rumik denai kamanyampaikan Lah tibo saruan dari kampuang Lah tibo jamputan nan mambao (mangih) Gadang mukasuik ka denai jalang Indak mukasuik hati maninggakan adiak Kini juo denai bajalan ….
Siti Rohani		Tuan kanduang lareh simawang Indak alu saalu nanko Alu tasanda di ateh tabiang Indak malu samalu nangko arang tacoreang diateh kaniang sadang basndiang tuan bajalan kamano muko ka suruakkan (mangih)
Siwawang		Maafkan denai adiak kanduang …..
Siti Rohani		Tuan ,,,,,, (Manangih) Oi tuan lareh simawang Kok baitu kato tuan kabaa juo ambo Di tatah indak tatah Nan bak manatah batang kapeh Ditarah juo nan jadi Ditagah indak tatagah Bak managah aia ilia Den lapeh juo jo ibo hati Tapi samantang pun baitu Ko jadi tuan ka pakan baok lah bungo lado ambo latakkanlah dalam peti kok jadi tuan bajalan baok lah ujuang namo ambo ka paureh kasiah mananti
Siwawang		Maaf kan denai adiak kanduang … Kini denai bajalan…..
Siti Rohani		Tuan …. Tuan ….. tuan ….. (Mangih)
LAREH SIMAWANG DATANG DARI BATU SANGKA YANG DIJEMPUT OLEH URANG JAGO GADANG
Siti  Rawiyah          :		Sanang  Bana Hati Adiak, Papueh Bana Manghadang Dunia, Gangam Paciak Dunia Nangko Diak ....! Adiak Urang Bapangkeik, Adiak  Urang Bakuaso Di Batusangka, Adiak  Basandiang, Di Simawang Darah Taserak........!
Lareh Simawang    :		Indak ……….. Indak jamilah …… Den nan salah jamilah …….. Den nan salah …….. Pisau Diambil Diatas Perut Siti Jamilah  Dan Langsung Membunuh Diri Sendiri,Pisau Keatas  Ditangkap Oleh Angku Kapalo Dan Menunduk Lareh Simawang Batigo  Kalian Mati ,.....! Barampek Jo Den......! Lareh Simawang Seperti Orang Gila Sambil Menangis Melihat Anak Dan Istrinya Meninggal
Angku Kapalo        :		Lah Salah Angku Mamasangkan, Adaik Dimano Angku Pakai, Limbago Dimano Angku Tuangkan, Manuruik   Adaik Di alamko, alam Banamo Minang Kabau, Namun Banamo Cucu Adam, Kok Tagaknyo Samo Tinggi, Kok Duduaknyo Samo Randah, Urang Asa Jo Urang Datang, Indak Ado Beda Jo Bedonyo, Nan Jadi Pokok Pangka, Dimano  Bumi  Dipijak   Disinan   Langik  Dijunjuang, Dima’a   Tabilang Tahantak  Disinan Tanaman Tumbuah, Adaik Samo Dipakai, Limbago Samo Dituangkan, Tapi Kok  Jalan  Diasak Urang  Lalu, Cupak Dialiah Urang  Panggaleh Itu pantangan urang minang …….. Lareh Simawang Gila Menangis Dan Tertawa
Siti  Rawiyah :		Dek Harok Basubang Gadang Talingo Rumpuang Tak Dikana Dek Haro Manghanang Dunia Hutang Tumbuah Saliliak  Pinggang.
Angku kapalo		Lah masak padi di ladang Dijamua mangko di kaka Lah malang lareh simawang Anak mati aka batuka

DENDANG 1 DAYANG DAINI

Mano sagalo niniak jo mamak

Sarato sanak jo sudaro 2x

Rila jo maaf nan kami mintak

Randai bamulai langkah di ankek 2x

DENDANG 2 SIMARANTANG RANDAH

Nan dibukak carito lamo

Lareh simawang rang imbaukan 2x

Inyo baranak duo urang

Siti darama jo asam sudin 2x

DENDANG 3 SIMARANTANG TINGGI

Jikok …..

Ado jarum nan patah

usah disimpan dalam peti

buang kan sajo ka piladang

Jikok

ado kato nan salah

usah disimpan dalam hati

buangkan sajo ka bulakang sanak oiiiiiiiiii……..

iyooo…….

mandaki jalan ka kayu

jalan lah lamo ka kota padang

randai sagitu molah dulu

talempong dibulakang sanak oi………